एजेन्सी – न्यूक्यासल युनाइटेडले इंग्लिस प्रिमियर लिगमा सानदार जित दर्ता गर्दै शीर्ष चारमा रहने सम्भावना बलियो बनाएको छ ।

घरेलु मैदानमा न्यूक्यासलले ब्राइटन होब अल्वियोनलाई ४–१ ले पराजित गर्दै शीर्ष चारमा रहने सम्भावना बलियो बनाएको हो ।सेन्ट जेम्स पार्क न्यूक्यासलमा घरेलु टोलीको जितमा ड्यानियल बर्न, कलुम विल्सन र ब्रुनो गुइमारेसले गोल गर्दा एक गोल उपहार पाएको थियो । ब्राइटनका डेनिज अन्डभले एक गोल फर्काए ।

खेलको २२औं मिनेटमा डेनिज अन्डभको आत्मघाती गोलबाट न्यूक्यासलले अग्रता लिन सफल भएको थियो । पहिलो हाफको इन्ज्युरी समयको थप गरिएको चौथो मिनेटमा ड्यानिल बर्नले गोल गर्दै न्यूक्यासलको अग्रता दोब्बर पारे । ५१औं मिनेटमा डेनिज अन्डभले गोल गर्दै खेललाई २–१ को स्थितिमा ल्याए ।

८९औं मिनेटमा कलुम विल्सनले गोल गर्दै न्यूक्यासललाई सहज जिततर्फ अग्रसर गराए । त्यसपछि इन्ज्युरी समयको थप गरिएको पहिलो मिनेटमा ब्रुनो गुइमारेसले गोल गर्दै न्यूक्यासललाई ४–१ को सानदार जित दिलाए ।

यस जितसँगै तेस्रो स्थानमा रहेको न्यूक्यासलको ३६ खेलबाट ६९ अंक पुगेको छ । एक खेल कम खेलेको युनाइटेडको ६६ अंक छ । पराजित ब्राइटन ३५ खेलबाट ५८ अंक जोडेर छैटौं स्थानमा छ ।