एजेन्सी – आरबी लाइप्जिग लगातार दाेस्राे सिजन जर्मन डिएफवी पोकलको च्याम्पियन बनेको छ । जर्मन बुन्डेसलिगा प्रतिद्धन्द्धी फ्रान्कफुर्टलाई २–० ले पराजित गर्दै लाइप्जिगले उपाधि जित्न सफल भएको हो ।

लाइप्जिगलाई च्याम्पियन बनाउन क्रिस्टोफर एनकुन्कु र डोमिनिक जोबोस्लाईले गोल गरे । दुवै गोल दोस्रो हाफमा भएको थियो ।

प्रतिस्पर्धात्मक र रोमाञ्चक बनेको खेलको ७१औं मिनेटमा क्रिस्टोफर एनकुन्कुले गोल गर्दै लाइप्जिगलाई १–० को अग्रता दिलाए । उनले डानी ओल्मोको पासमा गोल गर्न सफल भए ।

८५औं मिनेटमा डोकिनिकले गोल गर्दै लाइप्जिगको अग्रता दोब्बर पारे । डोमिनिकले एनकुन्कुको पासमा गोल गर्न सफल भएका थिए । त्यसपछि थप गोल निस्कन नसक्दा लाइप्जिग च्याम्पियन बन्न सफल भयो ।

लाइप्जिग लगातार दोस्रो सिजन डिएफवी पोकल च्याम्पियन बन्न सफल भएको हो । लाइप्जिग चारपटक फाइनल प्रवेश गर्दा दोस्रो पटक च्याम्पियन बन्न सफल भएको हो । लाइप्जिगले गत सिजन फ्रेइवर्गलाई पराजित गर्दै पहिलोपटक डिएफवी पोकलको उपाधि जितेका थिए ।

त्यो भन्दा एक संस्करणअघि लाइप्जिग बोरुसिया डर्टमुन्डसँग तथा २०१८–१९ को सिजनमा बायर्न म्युनिखसँग पराजित हुँदै उपाधि विमुख बनेको थियो ।