काठमाडौं (हाम्रो खेलकुद) – एफसी महिला यू–२० एसियन कप छनोटमा नेपालले लगातार तेस्रो हार बेहोरेको छ ।शनिबार भएको खेलमा चाइनिज ताइपेईंसँग ५–० को भारी अन्तरले पराजित हुँदै छनोटमा नेपाल लगातार तेस्रो हार बेहोरेको हो ।

यसअघि नेपालले चीन र घरेलु टोली म्यानमारसँग समान ५–० कै हार बेहोरेको थियो । लगातार तेस्रो हारसँगै नेपाल छनोटको समूह चरणबाटै बाहिरिएको छ ।

नेपालले छनोटमा ३ खेलबाट जित र अंकविहीन हुँदै पुछारमा रह्यो । नेपाल रहेको समूह ‘बी’ बाट चीन र चाइनिज ताइपेईं यू–२० महिला एसियन कपमा छनोट भएको छ । अर्काे समूह ‘ए’ बाट अष्ट्रेलिया र भियतनामले एसियन कपमा स्थान बनाएको छ ।

आयोजक उज्वेकिस्तान, जापान, उत्तर कोरिया र दक्षिण कोरिया छनोट भइसकेका छन् । यू–२० महिला एसियन कप २०२४ को मार्च ३ देखि १६ सम्म उज्वेकिस्तानमा हुँदैछ ।

थुवुना स्टेडियम याङअन म्यानमारमा शनिबार भएको खेलमा चाइनिज ताइपेईंको जितमा हि जिया सियुएनले दुई तथा लिउ यु चियाओ, लाई यु चि र सिन यि चिङले समान एक गोल गरिन् । सबै पाँच गोल दोस्रो हाफमा भएको थियो ।

खेलको नवौं मिनेटमा लिउ यु चियाओले गोल गर्दै चाइनिज ताइपेईलाई अग्रता दिलाईन् । २०औं मिनेटमा लाई यु चिले गोल गर्दै ताइपेईंको अग्रता दोब्बर पारिन् । ३६औं मिनेटमा सिन यि चिङले गोल गरेपछि ताइपेई खेलमा ३–० ले अघि बढ्यो ।

त्यसपछिको दुवै गोल हि जिया सियुएनको नाममा रह्यो । उनले खेलको ४१औं र ४५औं मिनेटमा गोल गरिन् । पहिलो हाफमा ५ गोल खाएको नेपालले दोस्रो हाफमा भने प्रदर्शन सुधार गर्दै थप गोल हुन दिएन ।