एजेन्सी – अन्तर्राष्ट्रिय मैत्रीपूर्ण खेलमा विश्व विजेता अर्जेन्टिनाले सहज जित हात पारेको छ । विश्वविजेता अर्जेन्टिनाले अष्ट्रेलियामाथि २–० को सहज जित हात पारेको हो ।

अर्जेन्टिनाको सहज जितमा कप्तान लियोनेल मेस्सीसँगै जर्मन पिजेलाले गोल गरे । पहिलो र दोस्रो हाफमा समान एक गोल सम्भव भएको थियो ।

वर्कस स्टेडियम बेइजिङ चीनमा बिहीबार भएको खेलमा कप्तान मेस्सीले आफ्नो खेल करिअरकै सबैभन्दा छिटो गोल गर्ने क्रममा ११९ सेकेण्डमै गोल गर्दै अर्जेन्टिनालाई १–० को अग्रता दिलाए ।

मिडफिल्डमा म्याथ्यु लेकीले बल फुत्काएपछि एन्जो फर्नान्डेसले दिएको पासमा मेस्सीले दुई डिफेन्डरलाई बिट गर्दै पेनाल्टी बक्सबाहिरबाट गरेको सशक्त प्रहारले टप कर्नरबाट जाली चुम्दा म्याथ्यु रायनले बचाउने कुनै अवसर नै पाएन ।

यससँगै ३५ वर्षीय मेस्सीले अर्जेन्टिनाका लागि पछिल्लो सात खेलमा लगातार गोल गर्न सफल भएका छन् । उनको यो पछिल्लो सात खेलमा मेस्सीको यो १०औं गोल हो ।

गत नोभेम्वरमा कतारमा भएको फिफा विश्वकपमा प्रि–क्वाटरफाइनलमा अष्ट्रेलियाविरुद्ध २–१ को जित निकालेको खेल यता, मेस्सीले सबै सात खेलमा गोल गर्न सफल भएका हुन् ।

६८औं मिनेटमा परिवर्तित खेलाडी जर्मन पिजिएलाले गोल गर्दै अर्जेन्टिनाको जित पक्का गरे । दोस्रो हाफको शुरुमै निकोलस ओटामेन्डीको स्थानमा मैदान छिरेका पिजिएलाले गोल गर्न सफल भएका थिए ।

यही खेलबाट १८ वर्षीय युवा विंगर एलेहान्द्रो गर्नाचोले अर्जेन्टिनाको सिनियर टोलीमा डेब्यु गरेका छन् । इंग्लिस क्लब म्यानचेस्टर युनाइटेडमा राम्रो छाप छाड्न सफल भएका गर्नाचो प्रशिक्षक लियोनेल स्कोलानीको नजरमा पर्न सफल भएका थिए ।