काठमाडौं (हाम्रो खेलकुद) – नेपाली राष्ट्रिय फुटबल टोलीले साफ च्याम्पियनसिप २०२३ मा सान्त्वना जित दर्ता गरेको छ । अन्तिम खेलमा पाकिस्तानलाई १-० ले पराजित गर्दै नेपालले जितसहित प्रतियोगिता अन्त्य गरेको हो ।

बेन्चबाट दोस्रो हाफमा मैदान छिरेका विंगर आशिष चौधरीले खेलको अन्त्यतिर गोल गर्दै नेपाललाई जित दिलाएका थिए । सुरुवाती दुई खेलमा हार बेहोरेपछि बाहिरिएका नेपाल र पाकिस्तानका लागि अन्तिम खेल प्रतिष्ठाको लडाई थियो । नेपाल पहिलो खेलमा कुवेतसँग ३-१ र भारतसँग २-० ले पराजित भएको थियो । पाकिस्तानले भने दुवै खेलमा ४-० को हार बेहोरेको थियो ।

पहिलो हाफको अन्त्यमा नेपालले अग्रता लिने अवसर गुमायो । विमल घर्ती मगरले पेनाल्टी क्षेत्र भित्रबाट गरेको प्रहार सिधै गोलरक्षक युसुफ बटको हातमा गएको थियो । ६१ औं मिनेटमा मनिष डाँगीको प्रहारलाई गोलरक्षक बटले विफल पारे ।

६८ औं मिनेटमा नेपालको अग्रतासामु क्रसबार बाधक बन्यो । देवेन्द्र तामाङले बायाँ विंगबाट गरेको फ्रिकिक प्रहार गोलरक्षक बटको हातमा छुँदै क्रसबारमा लागेर फर्किएको थियो । त्यसको दुइ मिनेटपछि एरिक विष्टले दायाँ विंगबाट प्रहार गरेको फ्रिकिक पोस्टमा लागेर बाहिरियो ।

८० औं मिनेटमा आशिष चौधरीले नेपाललाई अग्रता दिलाए । लाकेन लिम्बुले पेनाल्टी क्षेत्र बाहिरबाट मिलाइदिएको पासलाई आशिषले गोलमा परिणत गरे । उनको भली प्रहारमा गोलरक्षक बटले डाइभ दिएपनि बल जोगाउन सकेनन् ।

इन्ज्युरी समयको पहिलो मिनेटमा नेपाल अग्रता दोब्बर पार्नबाट चुक्यो । लाकेन लिम्बु र नवयुग श्रेष्ठको ६ यार्ड बक्स भित्रबाट लगातारको प्रहार गोल हुन सकेन ।

यस समूहबाट भारत र कुवेत सेमिफाइनलमा प्रवेश गरिसकेका छन् । यी दुईबीच समूह विजेता बन्न आज साँझ ७:४५ बजे प्रतिस्पर्धा हुनेछ ।