एजेन्सी – गत साता इंग्लिस फुटबलको चौथो श्रेणीको क्लब न्युपोर्ट काउन्टीसँग सम्झौता गरेका मिडफिल्डर किवन राईले वेल्सको राष्ट्रिय टोलीबाट नै खेल्न चाहेको बताएका छन् ।

इंग्लिस फुटबलको व्यावसायिक लिगमा अनुबन्धित हुने पहिलो नेपाली मुलका खेलाडी बनेका किवनले बिबिसीसँगको अन्तर्वार्तामा वेल्सबाट नै अन्तर्राष्ट्रिय फुटबल खेल्न चाहेको बताएका हुन् । किवनले आफ्नो आमा-बुबा नेपाली भएकाले नेपाली पासपोर्ट र नागरिकता लिएको अवस्थामा नेपालको राष्ट्रिय फुटबल टोलीबाट खेल्न पाउँथे । तर वेल्समा जन्मिएका उनले अन्तर्राष्ट्रिय फुटबल कहाँबाट खेल्नेबारे कुनै दुविधा नरहेको अभिव्यक्ति दिएका हुन् ।

‘मेरो सपना एकदिन वेल्सबाट खेल्ने नै छ,’ किवनले भने, ‘म यहाँ जन्मिएको हुँ । मेरो साथीहरु पनि सबै यहींबाट नै छन् । मेरो लागि यो नै सहि निर्णय जस्तो लाग्छ । म यहाँकै मान्छे हुँ,’ किवनले भने ।

किवनका पिता गज राई ब्रिटिस गुर्खामा कार्यरत रहेका थिए । २२ वर्ष गुर्खामा काम गरेका उनले छोराका लागि वेल्समा नै रिटायर भएपछिको जीवन बिताउने निर्णय लिएका थिए । नेपालको संस्कृतिसँग निकट रहेको बताउने किवनले नेपालमा हुने चर्चाबारे आमा-बुबाले देखाउने गरेपनि आफूलाई भने त्यसमा खास चासो नरहेको बताए ।

‘म नेपालमा भएको चर्चामा अड्किन चाहन्न, तर मलाई आमा बुबाले देखाइरहनु हुन्छ,’ उनले भने, ‘मेरो प्रशंसा गरेकोमा म खुसी छु र धन्यवाद भन्न चाहन्छु । तर मैले यो समय आफ्नो लक्ष्यमा ध्यान दिन जरुरी छ । उनले अबको आवश्यकता कडा मिहिनेत गर्नुपर्ने रहेको पनि बताए ।’

किवनले बेर्कनमा रहेर आफ्नो युवा अवस्थामा फुटबल खेल्ने गर्थे । उनले न्युपोर्टको अन्डर-१६ टोलीमा ट्रायल दिएपछि करिअरले उडान भरेको थियो । सन् २०२३ मार्चमा मात्र १७ वर्ष हुँदा उनले पहिलो टोलीमा डेब्यु गरेका थिए । गत सिजन लिगको अन्तिम खेलमा सुरुवात गरेका किवनले यस सिजनको सुरुवातमा सम्झौता गरेका थिए ।