एजेन्सी – इंग्लिस प्रिमियर लिगको क्लब न्युकासल युनाइटेडले इटालियन क्लब एसी मिलानबाट मिडफिल्डर सान्ड्रो टोनालीलाई अनुबन्धन गरेको छ ।

२३ वर्षीय मिडफिल्डरलाई भित्रयाउन न्युकासलले ५५ मिलियन पाउण्ड खर्च गरेको अनुमान रहेको छ । २३ वर्षीय मिडफिल्डरले इंग्लिस क्लबसँग ५ वर्षका लागि सम्झौता गरेका छन् । न्युकासलले यस सिजन च्याम्पियन्स लिग खेल्ने हुँदा प्रशिक्षक एडी हाउले सिजनको पहिलो अनुबन्धन पूरा गरेका हुन् ।

टोनालीले सन् २०२१-२२ सिजनमा एसी मिलानलाई सिरी ए उपाधि दिलाउन महत्त्वपूर्ण योगदान दिएका थिए । उनी गत सिजन टोलीले च्याम्पियन्स लिगको सेमिफाइनल यात्रा तय गर्दा पनि केन्द्रमा थिए ।

मिडफिल्डर टोनालीले न्युकासलको रक्षात्मक मिडफिल्डरको भूमिका खेल्ने अनुमान गरिएको छ । कलिलो उमेरमा नै युरोपको शीर्ष क्लबमा खेलेको अनुभव रहकाले न्युकासलले उनीसँग ठूलो अपेक्षा राखेको छ ।

टोनालीले न्युकासलमा खेल्नका लागि आफू निकै उत्साहित रहेको बताएका छन् । प्रशिक्षक हाउले पनि टोनालीको मानसिक, शारीरिक र प्राविधिक क्षमता टोलीमा निकै काम आउने बताए ।

टोनाली यस अनुबन्धन सँगै सबैभन्दा महँगा इटालियन खेलाडी बने । यसअघि चेल्सीले नेपोलीका जर्जिन्होलाई ५० मिलियन पाउण्ड खर्चेर अनुबन्ध गरेको थियो ।