काठमाडौं (हाम्रो खेलकुद)– नवीन न्यौपानेले त्रिभुवन आर्मी फुटबल क्लबको पुरुष टोलीको प्रशिक्षकबाट राजीनामा दिएका छन् । अखिल नेपाल फुटबल संघ (एन्फा) हेड अफ एकेडेमी नियुक्त भएपछि न्यौपानेले आर्मीको प्रशिक्षक पद त्यागेका हुन् । आर्मीमा ७ वर्षको आफ्नो प्रशिक्षण जीवन सुखद रहेको न्यौपानेले बताए ।

‘मैले एक सिजन आफ्नै पुरानो क्लब मनाङ मस्र्याङ्दी क्लब हेर्ने मौका पाए,’ न्यौपानेले भने, ‘त्यसपछि पछिल्लो सात वर्ष आर्मीमा रहँदा टोली सहिद स्मारक ए डिभिजन लिगको च्याम्पियन र आहा गोल्ड कप जिताउन सकिन बाँकी त्यसबाहेक अधिकांश प्रतियोगिता जिताउन सफल भए । मेरो लागि आर्मीको सात वर्षे यात्रा प्रशिक्षण जीवनको स्वर्णिमकालको रुपमा लिएको छु ।’

२०७३ मा आर्मीमा आबद्ध भएयता न्यौपानेले आठौं राष्ट्रिय खेलकुदमा स्वर्ण पदकसहित २४ वटा उपाधि दिलाएका थिए । लिगमा उनको प्रशिक्षणमा आर्मीले दोस्रो स्थान प्राप्त गरेको थियो । एन्फाले पहिलादेखि नै प्रस्ताव गरेकोले नयाँ चुनौती स्वीकार गर्दै हेड अफ एकेडेमीको जिम्मेवारी सम्हाल्न लागेको न्यौपानेले बताएका छन् ।

‘आर्मीमा हुँदा मैले धेरै अनुभव बटुल्ने मौका पाएको छु । त्यहाँको वातावरण एकदमै व्यवसायिक छ,’ उनले भने, ‘अब नयाँ यात्राको सुरुवात हुँदैछ । आशा छ राम्र्रै हुन्छ होला । आफ्नोतर्फबाट पूरा प्रयास गर्नेछु ।’

एन्फा प्रवक्ता सुरेश शाहका अनुसार एन्फाले बुटवल र धरानमा सन्चालन गर्दै आएको एकेडेमी तथा भविष्यमा महिला खेलाडीका लागि तीन ठाँउमा सन्चालन गर्न लागिएको महिला एकेडेमीको प्रमुख न्यौपाने रहेका छन् । यसअघि नवीन महर्जनले युथ हेड अफ इलिट र हेड अफ एकेडेमीको पनि जिम्मेवारी निर्वाह गर्दै आएको उल्लेख गर्दै शाहले भने, न्यौपाने हेड अफ एकेडमी र महर्जन युथ हेड अफ इलिटको जिम्मेवारीमा काम गर्नुहुनेछ ।

आर्मीले मेघराज केसीलाई नयाँ प्रशिक्षकका रुपमा अनुबन्धन गर्ने तयारी गरिरहेको बताइएको छ । केसी र आर्मी क्लबबीच बुधबार सम्झौता हुने सम्भावना रहेको बताइएको छ । केसीले यसअघि पनि आर्मीको टोली सम्हालेका थिए । गत महिना सम्पन्न लिगमा भने केसी थ्री स्टार क्लबको प्रशिक्षक थिए ।