काठमाडौं (हाम्रो खेलकुद)– अखिल नेपाल फुटबल संघ (एन्फा) ले अर्को महिना दशरथ रंगशालामा हुने नेपाल र लाओसबीचको विश्व कप एसिया जोन छनोटका लागि १५ हजार अमेरिकी डलरमा सिंगापुरको स्पोर्टस फाइभलाई मिडिया र विज्ञापन अधिकार विक्री गर्ने निर्णय गरेको छ ।

नेपाल र लाओसबीच असोज २५ गते दशरथ रंगशालामा पहिलो लेग र लाओसमा असोज ३० गते दोस्रो लेग हुनेछ । पहिलो चरण पार गरेको खण्डमा भने दोस्रो चरणको छनोटका लागि पनि एन्फाले ६५ हजार अमेरिकी डलरमा स्पोर्टस फाइभलाई मिडिया र विज्ञापन अधिकार दिने निर्णय गरेको छ ।

यसबाहेक अध्यक्ष पंकजविक्रम नेम्बाङको अध्यक्षतामा आइतबार बसेको कार्यसमितिको आकस्मिक बैठकले घाइते, विरामी खेलाडी, रेफ्री र रेफ्रीको परिवारलाई ११ लाख ५० हजार रुपैयाँ आर्थिक सहयोग गर्ने निर्णय गरेको छ ।

घाइते रहेका राष्ट्रिय यू १५ की यसोदा बोहरालाई ५ लाख, यू १९ खेलाडी सन्जोग मोक्तानलाई १ लाख ५० हजार र सिताकुमारी पौडेललाई १ लाख रुपैयाँ दिने निर्णय गरेको छ । बैठकले स्वर्गीय फिफा सहायक रेफ्री विक्रम चौधरीको परिवारलाई ३ लाख रुपैयाँ आर्थिक सहयोग गर्ने र पूर्व फिफा सहायक रेफ्री तथा एसेसरलाई १ लाख रुपैयाँ उपचार खर्च दिने निर्णय गरेको छ ।

महिला तथा अन्य फुटबल विकासको कार्यक्रम संचालन गर्न विभिन्न देशका फुटबल संघ र दातृ निकायसँग आवश्यक पर्ने आर्थिक तथा अन्य सम्झौताका लागि संघले अध्यक्ष नेम्बाङलाई अख्तियारी दिएको एन्फाले जनाएको छ । त्यस्तै नेपाली राष्ट्रिय फुटबल टोली र बेलायतको तेस्रो श्रेणीको टोलीबीच सन् २०२४ को अप्रिल मेमा दुई वटा मैत्रीपूर्ण खेल खेल्ने निर्णय गरेको छ ।