काठमाडौं (हाम्रो खेलकुद) – इन्ज्युरी समयमा स्टेफन बिनोङले गोल गर्दा बुटवल लुम्बिनी फुटबल क्लबले नेपाल सुपर लिग २ मा फुटबल क्लब चितवनलाई जितबाट बन्चित गरेको छ । लिगमा लगातार दोस्रो जितको संघारमा पुगेको चितवन १-१ को बराबरीमा रोकियो ।

दशरथ रंगशालामा गोलरहित पहिलो हाफपछि दोस्रो हाफमा पनि दुवै टोलीले आक्रामक फुटबल पस्कन सकेनन् । चितवनले बल पोसेसन अधिकांश समय आफ्नो पक्षमा राख्दै आक्रमण बुन्ने प्रयास भने गरिरह्यो । बुटवलका गोलरक्षक ममडुको गल्तीमा उत्सव राईले फाइदा उठाउँदै चितवनलाई अग्रता दिलाए ।

जितको नजिक पुगेको चितवन इन्ज्युरी समयमा अग्रता गुमाउन पुग्यो । गोलरक्षक र डिफेन्सबीच पेनाल्टी क्षेत्रभित्र राम्रो समन्वय नहुँदा बिनोङले बराबरी गोल गर्ने अवसरको सदुपयोग गरे । यससँगै चितवनको ४ खेलमा ५ अंक छ भने बुटवलको ४ खेलमा ४ अंक छ ।

पहिलो मिनेटमै चितवनका उत्सव राईले बक्सको छेउबाट लिएको प्रहारमा गती र दिशा दुवै थिएन । छैठौं मिनेटमा चितवनकै रोशन राना मगरले बक्स बाहिर बाट लिएको प्रहार पोस्टको धेरै टाढाबाट बाहिरियो ।

१५औं मिनेटमा चितवनका टोरिक जेब्रिनको कर्नर बुटवल गोलरक्षक मोहम्मडूले पन्च गरिदिए । १९औं मिनेटमा चितवनकै अफ्रिए अक्वाहको फ्रिकिकले बुटवललाई समस्या दिन सकेन । सोही फ्रि-किक पछिको काउन्टर अट्याकमा स्टेफन बिनोङको प्रहार चितवनका कप्तान तथा गोलरक्षक विशाल श्रेष्ठले सहजै समाते ।

२३औं मिनेटमा विमल घर्ती मगरको प्रहार पनि पोस्ट तर्फ जान सकेन । २८औं मिनेटमा टोरिकको प्रहार बक्समा ब्लक हुन पुग्यो । ३७औं मिनेटमा टोरिक बक्समा लड्दा पेनाल्टीको अपील गरेका थिए तर रेफ्रीले प्रज्वल क्षेत्रीले पेनाल्टी दिएनन् । ४०औं मिनेटमा रफिक अमिनुले बक्स भित्र बाट पोस्टको माथि प्रहार गरे ।

४२औं मिनेटमा विमलले ठूलो मौका खेरा फाले । बक्सको दायाँतर्फ अमिनुले दिएको थ्रु-पासमा मोहम्मडुलाई चिप गर्न खोज्दा विमलको प्रहार पोस्टको माथिबाट बाहिरियो ।

४७औं मिनेटमा अफ्रिएको थ्रु- पासमा अमिनुले खेलेको क्रसमा एकराज बुढाथोकीले चाहेजस्तो संपर्क बनाउन सकेनन् । सोही मिनेटमा विमलको अर्को थ्रु पासमा अमिनु पुग्न सकेनन् ।

४८औं मिनेटमा चितवनले खेलमा अग्रता लियो । अमिनुको क्रस सिधै मोहम्मडुको हातमा पुगेपछि बुटवल गोलरक्षकले खेल्न खोजेको लामो पास सिधै उत्सव राईको खुट्टामा पुग्यो । उत्सवले किपर पोस्टमा नभएको अवसरमा भली प्रहार गर्दा मोहम्मडु पोस्टमा पुगिसकेका थिए । तर सही आँकलन गर्न नसक्दा उनले सो बल फुस्काउन पुगे र बलले जालि चुम्यो ।

५३औं मिनेटमा बिनोङको प्रहार पुनः विशालले सहजै बचाए । ६३औं मिनेटमा उनले नै अर्को मौका खेरा फाले । एरीक विष्टको कर्नर बिनोङको खुट्टामा पुगेपछि उनले गरेको प्रहार पोस्टको केही टाढाबाट बाहिरिएको थियो ।

७८औं मिनेटमा टोरीकको प्रहार मोहम्मडुले फुस्काएपनि कुनै खतरा रहेन । अर्को तर्फ काउन्टर अट्याकमा जिलेस्पी जंग कार्कीको पासमा एरिकको प्रहार पोस्टको केही माथिबाट बाहिरियो ।

८३औं मिनेटमा बिनोङले बराबरी गर्ने ठूलो अवसर खेरा फाले । उनले निरञ्जन धामीका लागि खेलेको थ्रु-पास कसैले क्लियर गर्न नसकेपछि प्रहार गर्न उनी आफै पुगेका थिए । गोलरक्षक बिट भइसकेको अवस्थामा उनले खाली पोस्टमा गरेको प्रहार बाहिर जान पुग्यो । ८९औं मिनेटमा बुटवलका सर्ज सङ्गले बक्स बाहिरबाट लिएको प्रहार पोस्टको केही टाढाबाट बाहिरिन पुग्यो ।

तर थपिएको समयको पहिलो मिनेटमा अन्ततः बुटवलले खेलमा बराबरी गोल गर्यो । मणि कुमार लामाले खेलेको लामो पासमा विशाल श्रेष्ठ, मार्को इभानोभिच र छिरिङ गुरुङको तालमेल नमिल्दा गोल हुन् पुग्यो । तीनै खेलाडी बल क्लिअर गर्न एक अर्कालाई कुर्दा बिनोङले मौकाको फाइदा उठाउँदै खाली पोस्टमा गोल गर्न सफल भए ।

लिग अन्तर्गत शुक्रबार वीरगन्ज युनाइटेड फुटबल क्लब र झापा फुटबल क्लबबीच खेल हुनेछ । दशरथ रंगशालामा खेल साँझ ५ बजे सुरु हुनेछ ।