काठमाडौं (हाम्रो खेलकुद) – दशरथ रंगशालामा जारी दोस्रो संस्करणको नेपाल सुपर लिगका शीर्ष दुई टोलीको खेलमा मध्यान्तर सम्म धनगढी एफसीले पोखरा थन्डर्स विरुद्ध १-० को अग्रता बनाएको छ ।

मिलान राईले पहिलो हाफको एक मात्र गोल गर्न सफल भएका हुन् । प्रतिस्पर्धात्मक रहेको पहिलो हाफमा खेल कुनै टोलीतर्फ ढल्किएको भने छैन । दुबै टोलीले मौका सिर्जना गरेपनि पहिलो बाजी धनगढीले मार्यो ।

४२औं मिनेटमा धनगढीले खेलमा अग्रता लियो । अहमद हिजाजीले आफ्नै पोस्टको बाहिर बल जितेर ओलावालेका लागि खेलेको थ्रु-पासमा फ्रान्कलिन टाल्लाले बल त जितेका थिए। तर उनले आफ्नो गोलरक्षक प्रिसोका लागि खेलेको पास ओलावालेको खुट्टामै पुगेपछि उनले दिएको पासमा मिलनले सहज गोल गरे ।

यसअघि चौथो मिनेटमा धनगढीका फलु डियाग्नेको लामो प्रहार पोखराका गोलरक्षक यभ्स प्रिसोले जोगाए ।

१० औं मिनेटमा पदम कुमार तामाङको लामो प्रहार फार-पोस्टको नजिकबाट बाहिरिदा पोखराले अग्रता बनाउने मौका गुमायो ।

१६ औं मिनेटमा सन्जिव विष्टको वान-अन-वान प्रहार धनगढीका गोलरक्षक मोहम्मद ताहाले बचाउ गरे।

२९ औं मिनेटमा डिबक्स भित्रबाट अभिषेक गुरुङको प्रहार गोलरक्षक प्रिसोले सहजै बचाए । ३३औं मिनेटमा धनगढीका मिलनको प्रहारमा अहमद हिजाजीको हेडर पोखराका गोलरक्षक प्रिसोले गोललाईनबाट क्लियर गरे।

३५ औं मिनेटमा डिबक्स एरिया नजिकबाट पोखराका पदक कुमार तामाङको प्रहार आकाशियो।

४५औं मिनेटमा स्टेफन अन्नोरको क्रस डिफ्लेक्ट भएर पोस्टमा लागेर बक्समा खसेको थियो । रिबाउन्डमा भने कमल बहादुर थापाले लडिरहेका गोलरक्षक ताहाको हातमा हान्न पुगेपछि पोखराले खेलमा बराबरी गर्न सकेन ।

पोखराको ७ खेलमा १४ अंक रहेको छ र शीर्ष दुईमा रहेर प्लेअफमा आफ्नो स्थान बनाइसकेको छ । उता धनगढीको ७ खेलमा १२ अंक छ । धनगढीले पनि प्लेअफमा आफ्नो स्थान बनाउन सफल भइसकेको छ । आज जित हासिल गरेमा धनगढीले पनि शीर्ष दुईमा आफ्नो स्थान पक्का गर्ने छ ।

एनएसएलमा लिग तालिकाको शीर्ष २ टोलीले सिधै फाइनलमा छनोट हुने क्वालिफायर खेल खेल्नेछन् । क्वालिफायरमा पराजित हुने टोलीले भने लिगको तेस्रो र चौथो स्थान प्राप्त गर्ने टोलीको विजेतासँग अर्को क्वालिफायर खेल्न पाउनेछ ।

आज हुने दिनको दोस्रो खेलमा झापा एफसी र एफसी चितवन भिड्ने छन् ।