एजेन्सी – पछि परेको अवस्था उल्ट्याउँदै प्रमुख दाबेदार जापानले एएफसी एसियन कपमा सुखद सुरुवात गरेको छ । २–१ ले पछि परेको भियतनामविरुद्धको खेल ४–२ जित्दै जापानले समूह डी मा ३ अंकका साथ यात्राको सुरुवात गरेको छ ।

खेलको ११औं मिनेटमा मोनाकोका ताकुमी मिनामिनोले गोल गर्दै खेलमा जापानलाई अग्रता दिलाएका थिए । कर्नरबाट आएको बलमा उनले बक्सको बिच भागबाट गोल गरेका थिए ।

तर १–० को अवस्था उल्ट्याउँदै भियतनामले खेलमा अग्रता बनायो । १६औं मिनेटमा बाक दिन्ह न्ग्वेनले गोल गर्दै खेल बराबर पुर्याएका थिए । ३३औं मिनेट तुआन हाई फामले भियतनामका लागि गोल गर्दै टोलीलाई अग्रता दिलाएका थिए ।

त्यसपछि राम्रो प्रदर्शन पस्किदै जापानले खेलमा ३ गोल गर्न सफल भएको थियो । ४५औं मिनेटमा वाटारु एन्डोको पासमा व्यक्तिगत दोस्रो गोल गर्दै मिनामिनोले खेल बराबरीमा ल्याएका थिए ।

पहिलो हाफको इन्ज्युरी समयमा जापानले खेलमा पुनः अग्रता लिएका थियोे । मिनामिनो कै पासमा केइटो नाकामुराले गोल गरेपछि जापाको अग्रता अन्तर बढेको थियो । टोलीले चौथो गोल ८५औं मिनेटमा मात्र गर्न सफल भयो । ताकेफुसो कुबोको पासमा आयासे युएडाले गोल गरेका थिए ।

सोही समूहका बाँकी दुई टोली इन्डोनेसिया र इराक भोली भिड्ने छन् । आज राती समूह सी का दुई खेल हुँदै छन् । नेपाली समय अनुसार साँझ ८ः१५ बजे युएई र हङकङ तथा राति ११ः१५ बजे इरान र प्यालेस्टाइनबीच प्रतिस्पर्धा हुनेछ ।