सेनेगलको सहज जित

एजेन्सी – आइभरी कोस्टमा जारी अफ्रिका कप अफ नेसन्स (एफकन) मा सोमबार पहिलो खेलमा सेनेगलले सहज जित दर्ता गरेको छ ।

समूह ‘सी’को खेलमा सेनेगलले १० खेलाडीमा सिमित गाम्बिया माथि ३–० ले हराएको छ । सेनेगलका लागि लामिन कमाराले २ र पापा गेयेले १ गोल गरे । चौथो मिनेटमा नै सेनेगलले खेलमा अग्रता लियो । स्टार खेलाडी तथा कप्तान साडियो मानेको पासमा गेयेले गोल गरे ।

पहिलो हाफको अन्तिम समयमा इबु एडम्सले रातो कार्ड पाएपछि गाम्बियाले १० खेलाडीमा सिमित भएर खेल्नु पर्यो । ५२औं मिनेटमा सेनेगलले अग्रता दोब्बर गर्यो । एस्माइला सारको पासमा कमाराले गोल गर्दै अग्रता दोब्बर बनाए । उनले नै ८६औं मिनेटमा इलिमान एन्डियाएको पासमा गोल गर्दै जित निश्चित गरे ।

सोही समूहका क्यामरुन र गिनी आज १०ः१५ बजे भिड्दै छन् । राति १ः४५ बजे हुने खेलमा अल्जेरिया र एंगोला भिड्ने छन् ।