एजेन्सी – एएफसी एसियन कपमा लगातार दोस्रो हार बेहोरेको छ । कतारमा जारी प्रतियोगितामा बिहीबार भारत उज्वेकिस्तानसँग ३–० ले पराजित भएको छ । भारतले अष्ट्रेलिया विरुद्धको पहिलो खेल २–० ले गुमाएको थियो ।

एसियन कपमा लगातार दोस्रो पटक छनोट भएको भारतले दोस्रो पटक नै सुरुवातका दुई खेलमा हार बेहोरेको छ । समूह बी अन्तर्गतको खेलको सबै गोल पहिलो हाफमा भएको थियो । सिरिया विरुद्ध बराबरी पछि तीन परिवर्तन गर्दै उज्वेकिस्तानको सुरुवाती ११ मा मौका पाउका खलाडीले नै समान १ गोल गरे ।

ओटाबेक शुकुरोभको हेडर पासमा गोल गर्दै अब्बोशेख फयजुलाएभले गोल गर्दै चौथो मिनेटमा उज्वेकिस्तानलाई अग्रता दिलाएका थिए । १८औं मिनेटमा इगोर सर्गेवले गरेको प्रहार पोस्टमा लागेर फर्किएपछि दोस्रो पटकमा गोल गर्दै अग्रता दोब्बर बनाए । पहिलो हाफको अन्त्य तिर शेरजोड नस्रुलोएभले तेस्रो गोल गर्दै भारतका लागि दोस्रो हाफमा पुनरागमनको लागि धेरै कसरत गर्नु पर्ने अवस्थामा पुर्याए ।

भारतले दोस्रो हाफमा केही सुधारिएको प्रदर्शन गर्यो । दुई पटक पोस्टमा प्रहार गर्दा भारतले उज्वेक गोलरक्षकबाट राम्रो बचाउ गर्न समेत बाध्य बनायो । जित पछि उज्वेकिस्तानको २ खेलमा ४ अंक छ । अष्ट्रेलिया २ खेलमा ६ अंक बनाउँदै अन्तिम १६ मा छनोट भइसकेको छ । अष्ट्रेलिया विरुद्ध आज हार बेहोरेको सिरियाको १ अंक रहँदा भारत भने अंकविहिन छ ।

समूह चरणको अन्तिम खेलमा अष्ट्रेलिया र उज्वेकिस्तान भिड्दा भारतले सिरियाको सामना गर्ने छ । ६ समूह मध्य शीर्ष दुई टोली सहित चार उत्कृष्ट तेस्रो स्थान हासिल गर्ने टोली पनि अन्तिम १६ मा छनोट हुने भएकाले भारतको नकआउट चरणमा पुग्ने सम्भावना कायम नै छ । तर त्यसका लागि भारतले अन्तिम खेल जित्नै पर्ने हुन्छ । आज नै समूह सी मा रहेका युएई र प्यालेस्टाइनबीत राती ११ः१५ बजे खेल हुँदैछ ।