एजेन्सी – लगातार दोस्रो पटक एसियन कपमा छनोट भएको भारतले समूह चरणको सबै खेलमा हार बेहोर्दै प्रतियोगिताबाट बाहिरिएको छ ।

आज भएको समूह चरणको अन्तिम खेलमा सिरिया विरुद्ध १-० ले पराजित भएसँगै भारतले सबै खेल हारेको हो ।

ओमार ख्रिबिनको ७६औं मिनेटको गोलको मद्दतले सिरियाले जित दर्ता गर्यो । भारतले भने तीनै खेलमा एक गोल समेत गरेन भने छ गोल खान पुग्यो । आजको खेलमा भारतले जित हासिल गर्न सकेको भएमा तेस्रो स्थानमा रहि अन्तिम १६ मा पुग्ने सम्भावना जीवित रहन्थ्यो । तर आज हार बेहोरेसंगै त्यो सम्भावना पनि सकिएको हो ।

एसियन कपमा हरेक समूहका शीर्ष दुई टोली सहित तेस्रो स्थान हासिल गर्ने उत्कृष्ट ४ टोली पनि अन्तिम १६ मा पुग्ने समीकरण रहेको छ ।

यस्तै सोही समूहको अर्को खेलमा आज अष्ट्रेलिया र उज्बेकिस्तान १-१ को बराबरी खेल्दै क्रमश: पहिलो र दोस्रो हुँदै नकआउटमा आफ्नो स्थान सुरक्षित गरेका छन् । अष्ट्रेलियाले ३ खेलमा ७ अंक हासिल गर्यो भने उज्वेकिस्तानले ५ अंक बटुल्यो । सिरिया ४ अंक सहित तेस्रो रह्यो ।

सिरियाले अन्तिम १६ मा आफ्नो स्थान पक्का भए-नभएको थाहा पाउनका लागि समूह चरणको अन्तिम खेलमा सम्म कुर्नु पर्ने हुन्छ ।

एसियन कपमा समूह सि का दुई खेल आज नै हुँदै छन् । ८:४५ बजे हङकङ र प्यालेस्टाइन भिड्दा इरान र युएई पनि एक अर्कासँग भिड्ने छन् ।