सिड्नी (हाम्रो खेलकुद) – नेपाली पुरुष राष्ट्रिय फुटबल टोलीका पुर्व फरवार्ड जुमानु राई अष्ट्रेलियाको सिड्नीमा रहेको सगरमाथा एफसीको मुख्य प्रशिक्षकमा नियुक्त भएका छन् ।

क्लबले उनलाई बुधबार मुख्य प्रशिक्षकमा नियुक्त गरेको जनाएको छ । राई केही समययता अष्ट्रेलियामै रहेका छन् । उनले गत महिना मात्रै नेपाल प्रहरीबाट प्रहरी नायव निरिक्षक (सई) मा अवकाश लिएका थिए । उनलाई नेपाल पुलिस क्लबकाे फुटबल टाेलीले बिदाईसमेत गरेको थियो ।

खेलाडी जीवनबाट राईले गत जेठमा सन्यासको घोषणा गरेका थिए । सहिद स्मारक ‘ए’ डिभिजन लिग अन्तरगत सातदोबाटो युथ क्लबमाथि १–० को जितपछि राईसँगै भोलानाथ सिलवालले पनि खेल जीवनबाट सन्यासको घोषणा गरेका थिए ।

नेपाली फुटबलका लेजेन्ड राईलाई सगरमाथा फुटबल क्लबमा नयाँ मुख्य प्रशिक्षकको भुमिकामा घोषणा गर्न पाउँदा क्लब परिवार हर्षित बनेको क्लबले जनाएको छ ।

‘नेपालसँगै अन्तर्राष्ट्रिय स्तरमा आफ्नो पहिचान स्थापित गरिसकेका उनीसँग दशकौं अनुभव र धेरै उपाधि जितेका छन् ,’ क्लबले भनेको छ, ‘उनी नेपाली फुटबलका लेजेन्ड हुन् । क्लबमा जुमानु राईलाई पाउँदा हामी अत्यन्तै उत्साहित छौं । हामी विश्वस्त छौं कि उनले हाम्रो टोलीमा विजयी मानसिकता जगाउनेछ । उनको नेतृत्व र विशेषज्ञताले टोलीलाई नयाँ उचाईंमा पु¥याउने र हाम्रो लक्ष्य प्राप्तिको नजिक ल्याउनेछ भन्ने हाम्रो विश्वास छ ।’

घरेलु फुटबलमा नेपाल पुलिस क्लबबाट खेलेका राईले नेपालको राष्ट्रिय टोलीबाट ११ अन्तर्राष्ट्रिय गोल गरेका छन् । उनले ५१ क्याप जितेका छन् ।