पोखरा (हाम्रो खेलकुद)- नेपाल पुलिस क्लब आहा!रारा पोखरा गोल्डकप‌ फुटबल प्रतियोगिताको क्वाटरफाइनलमा पुगेको छ ।

विभागीय डर्बीमा एपिएफ फुटबल क्लबलाई २-० हराउँदै पुलिस अन्तिम आठमा पुगेको हो ।

पोखरा रंगशालामा पुलिसलाई जिताउन दुबै गोल मानबहादुर परियारले गरे । उनले पहिलो हाफ र दोस्रो हाफमा‌ गोल गरे ।

१९ औं मिनेटमा प्रताप गुरुङको फ्रिकिकमा पेनाल्टी बक्सबाट मानले हेड मार्फत पहिलो गोल गरेका हुन्। ७१औं मिनेटमा क्रसमा आएको बलमा हेड मार्फत नै उनले दोस्रो गोल गरे।

२०६४ मा भएको छैटौं आहा गोल्डकपको फाइनलमा यिनै दुई विभागीय टोली फाइनलमा पुगेका थिए । त्यतिबेला पनि पुलिसले एपिएफलाई २–० ले हराएको थियो ।

२२ औं संस्करणसम्म ११ पटक फाइनल खेलको पुलिसले ६ पटक उपाधि जितेको थियो। पुलिसले क्वार्टरफाइनलमा माघ १६ गते चर्च ब्वाइजको सामना गर्नेछ ।

सहारा क्लब पोखराको आयोजनामा जारी प्रतियोगितामा शनिबारबाट क्वार्टरफाइनलका खेल सुरु हुनेछन् ।

पहिलो क्वाटरफाइनलमा भुटानको पारो एफसी र थ्रीस्टारबीच हुनेछ । थ्री स्टारले पहिलो खेलमा आयोजनक टोलीलाई हराएको थियो। पारो सिधै क्वाटरफाइनलमा खेल्दै छ।

आहाको विजेताले १२ लाख १ हजार र दोस्रो हुने टोलीले ६ लाख १ हजार रुपैयाँ प्राप्त गर्नेछ।