एजेन्सी – दक्षिण अफ्रिका अफ्रिका कप अफ नेसन्सको सेमिफाइनलमा प्रवेश पुगेको छ ।

शनिबार क्वार्टरफाइनल केप भर्डेलाई टाइब्रेकरमा २-१ हराउँदै दक्षिण अफ्रिका अफ्रिका कप अफ नेसन्सको सेमिफाइनलमा पुगेको हो।

निर्धारित समयमा र अतिरिक्त समयमा गोलरहित बराबरी टुंगिएपछि खेल पेनाल्टी सुटआउटमा पुगेको थियो।

दक्षिण अफ्रिकालाई विजयी गराउन कप्तान समेत रहेका रोनवेन विलियम्सले केप भर्डेको ४ पेनाल्टी रोके ।
उनले केप भर्डेका बेबे, विली सेमेडो, लरोस ड्वार्टे र प्याट्रिक एन्ड्राडेको पेनाल्टी सफल हुने दिएनन् । केप भर्डेका ब्रयान टेइक्सेराले मात्रै गोल गरेका थिए।
केप भर्डेका गोलकिपर भोजिन्हा दक्षिण अफ्रिकाको दुई प्रहार रोके। दक्षिण अफ्रिकाले सेमिफाइनलमा नाइजेरियाको सामना गर्नेछ ।

त्यसअघि आयोजक आइभरी कोस्टले मालिमाथि २-१ को नाटकीय जित निकाल्दै सेमिफाइनलमा प्रवेश गरेको छ।

आइभरी कोस्ट ४३ औं मिनेटमै १० खेलाडीमा समेटिएको थियो । त्यसका बाबजुद १२२ औं मिनेटको गोल गर्दै अन्तिम चारमा पुग्न सफल भयो।

ओडिलोन कोसोउनोस दोहोरो पहेंलो कार्डका कारण मैदान छाडेपछि घरेलु टोली पहिलो हाफमा नै १० खेलाडीमा सिमित भएको थियो।

७१ औं मिनेटमा नेनी दोर्जेलेसको गोलमा मालीले अग्रता लिएको थियो। अन्तिम मिनेटमा आइभरी कोस्टले बराबरी गोल फर्कायो। सिमन अदिनग्रासले बराबरी गोल गरेका थिए।

त्यसपछि अतिरिक्त समयको अन्तिम केही मिनेट बाँकी रहँदा डियकिटेले निर्णायक गोल गरेका थिए। त्यसपछि डियकिटेले पनि दोहोरो पहेंलो कार्डका कारण मैदान छाड्नु परेको थियो ।

आइभोरी कोस्टले ९ र मालीले १० खेलाडीमा सिमित हुँदै खेलको अन्त्य गरेको थियो। आइभरी कोस्टले कंगो सँग सेमिफाइनल खेल्नेछ।