एजेन्सी – बायर्न म्युनिखको खराब प्रदर्शनले निरन्तरता पाएको छ। बायर्न म्युनिखले पछिल्लो ९ दिनमा तेस्रो हार बेहोर्ने क्रममा आइतबार बुन्डेस लिगामा भिएफएल बोचुमसँग ३-२ ले पराजित भएको छ ।

खेलमा लिएको अग्रता जोगाउन बायर्नले असफल भएको‌ थियो । खेलको १४ औं मिनेटमा जमाल मुसियालाले गोल गर्दै टोलीलाई अग्रता दिलाएका थिए ।

तर पहिलो हाफको अन्त्यतिर बोचुमले २ गोल गर्दै अग्रता बनाएको थियो । टाकुमा असानोले ३८ औं र केभेन स्क्लोटरबेकले ४४ औं मिनेटमा गोल गरेका थिए।

७६ औं मिनेटमा डायोट उपामेकानोले रातो कार्ड पाएपछि बायर्न १० खेलाडीमा सिमित भएको थियो । ७८ औं मिनेटमा केभिन स्टोजरले पेनाल्टीबाट गोल गर्दै बोचुको‌ अग्रतालाई फराकिलो बनाएका थिए।

खेल सकिन ३ मिनेट बाँकी रहँदा ह्यारी केनले गोल फर्काए पनि टोलीको हारबाट टरेन । यसअघिका‌ दुई खेलमा बायर्न लेभरकुसनसँग ३-० र च्याम्पियन्स लिगमा लाजियोसँग १-० ले पराजित भएको थियो । सन् २०१५ मेयता बायर्नले लगातार ३ खेल गुमाएको यो पहिलोपटक हो ।

शीर्ष स्थानको‌ लेभरकुजन भन्दा बायर्न ८ अंकले पछि परेको छ । दोस्रो स्थानमा‌ रहेको बायर्नको २२ खेलमा ५० अंक छ । बोचुमको २५ अंकसहित ११ औं स्थानमा छ ।