एजेन्सी – स्पेनिस क्लब रियल म्याड्रिडका प्रभावशाली जर्मन मिडफिल्डर टोनी क्रुसले अन्तर्राष्ट्रिय खेलबाट लिएको सन्यास फिर्ता लिएका छन् ।

जर्मनीको राष्ट्रिय टोलीका मुख्य प्रशिक्षक जुलियन नागेल्सम्यानसँगको वार्तापछि क्लब फुटबलमा लगातार उच्च प्रदर्शन गरिरहेका ३४ वर्षीय क्रुसले आफ्नो सन्यास फिर्ता लिएका हुन् ।

जर्मनीले यसैवर्ष युरोकप २०२४ को आयोजना गर्दैछ । घरेलु मैदानमा हुने युरोकपलाई नै मध्यनजर राख्दै उनले सन्यास फिर्ता लिएको बुझिएको छ ।

जर्मन फुटबल एसोसिएसन र तत्कालिन प्रशिक्षकसँग राम्रो सम्बन्ध रहन नसकेपछि र युरो २०२० मा आफ्नो प्रदर्शनको चर्काे आलोचना भएपनि उनले सन् २०२१ का अप्रत्यासित रुपमा सन्यासको घोषणा गरेका थिए । त्यसबेला जर्मनी प्रि–क्वाटरफाइनलमा इंग्ल्यान्डसाग पराजित भएको थियो ।

उनी अर्को महिना फ्रान्स र नेदरल्याण्ड्सविरुद्ध हुने अन्तर्राष्ट्रिय मैत्रीपूर्ण खेलका लागि नागेल्सम्यानको टोलीमा छनोट हुन योग्य छन् । युरो सन २०२४ को उद्घाटन खेलमा शुक्रबार जुन १४ मा जर्मनीले स्कटल्याण्डको सामना गर्दैछ ।

क्रुसले सन् २०१० देखि २०२१ को बीचमा जर्मनीका लागि १०६ क्याप जित्दा १७ अन्तर्राष्ट्रिय गोल गरेका छन् । उनी सन् २०१४ मा ब्राजिलमा भएको फिफा विश्वकपको उपाधि जित्दा उनी टोलीका महत्वपूर्ण सदस्य थिए ।

क्रुसले बायर्न म्युनिख र रियल म्याड्रिडबाट समान ३ बुन्डेसलिगा र ला लिगा जितेका छन् । यस्तै उनले रियलबाट पाँचपटक च्याम्पियन्स लिग जितेका छन् ।