दिपक बोहोरा, पाँचथर

पाँचथरमा अर्को महिना पाँचौ कुम्मायक गोल्डकप फुटबल प्रतियोगिता आयोजना हुने भएको छ । कुम्मायक स्पोर्टिङ क्लबको आयोजनामा हुने चैत ११ गतेबाट हुने प्रतियोगितामा पाँचथरका ८ स्थानिय तहहरुको सहभागिता रहने शुक्रबार पत्रकार सम्मेलन मार्फत जानकारी दिएको हो ।

यासोक स्थित पृथ्वी माविको खेलमैदानमा हुने प्रतियोगिताको विजेताले चाँदीको ट्रफि सहित १ लाख ११ हजार १ सय ११ रुपैयाँ र दोस्रो हुने टोलीले ५५ हजार ५ सय ५५ रुपैयाँ प्राप्त गर्नेछ ।

सर्वोत्कृष्ट खेलाडी १५ हजार तथा सर्वाधिक गोलकर्ता, उत्कृष्ट गोलकिपर, डिफेन्डर, मिडफिल्डर र प्रशिक्षकले समान ५ हजार रुपैयाँ प्राप्त गर्नेछन् । हरेक खेलको म्यानअ अफ दी म्याचले ३ हजार र फ्यान अफ दि म्याच हुने दर्शकले १ हजार रुपैयाँ पाउनेछन् ।

गोला प्रथाबाट शुक्रबार नै खेल तालिका सार्वजनिक गरिएको छ । समुह ‘ए’ मा कुम्मायक गाउँपालिका, मिक्लाजुङ, तुम्बेवा र हिलिहाङ गाउँपालिका रहेका छन् । समुह ‘बि’ मा याङवरक गाउँपालिका, फिदिम, फालेलुङ र फाल्गुनन्द गाउँपालिका रहेका छन् । उद्घाटन खेल चैत ११ गते कुम्मायक र मिक्लाजुङ गाउँपालिकाबीच हुनेछ । चैत १५ गते प्रतियोगिताको फाइनल खेल हुनेछ ।