बंगलादेश यु-१६ महिला साफको फाइनलमा

काठमाडौं (हाम्रो खेलकुद) – बंगलादेश काठमाडौंमा जारी साफ यु-१६ महिला च्याम्पियनसिपको फाइनलमा प्रवेश गरेको छ । सातदोबाटो स्थित एन्फा कम्प्लेक्समा आज भएको खेलमा भारत माथि ३-१ को जित निकाल्दै बंगलादेशले फाइनलमा आफ्नो स्थान सुरक्षित गरेको हो ।

बंगलादेशको जितमा अल्पि अख्तर, सौरभी प्रिती र अर्पिता विश्वासले समान एक-एक गोल गरे । भारतका लागि अनुष्का कुमारीले एक गोल गरेपनि अन्त्यमा बंगलादेश जित तर्फ उन्मुख हुन पुग्यो ।

आजको जित सँगै बंगलादेशको दुई खेलमा ६ अंक भएको छ । बंगलादेशले पहिलो खेलमा नेपाल माथि २-० को जित निकालेको थियो । भारतले भने भुटान विरुद्ध पहिलो खेलमा ७-० को जित निकालेको थियो ।नेपाल र भारतको समान ३-३ अंक छ ।

नेपाल र भारत बीच बिहीवार हुने खेलले फाइनल पुग्ने अर्को टोलीको टुंगो लाग्नेछ । शुक्रबार बंगलादेशले राउण्ड रोबिन चरणको अन्तिम खेलमा भुटानको सामना गर्नेछ । चार टोली सम्मिलित प्रतियोगिताको फाइनल खेल फाल्गुन २७ गतेका दिन हुनेछ ।