एजेन्सी – दक्षिण अमेरिकी राष्ट्र कोलम्वियाले युरोपेली राष्ट्र स्पेनमाथि ऐतिहासिक जित दर्ता गरेको छ । लन्डन स्टेडियम लन्डनमा शुक्रबार राति भएको अन्तर्राष्ट्रिय मैत्रीपूर्ण खेलमा कोलम्वियाले स्पेनलाई १–० ले पराजित गर्दै ऐतिहासिक जित निकालेको हो ।

कोलम्वियाले पहिलोपटक कुनै पनि खेलमा स्पेनलाई हराएको हो । यसअघि कोलम्वियाले स्पेनलाई हराउन सकेको थिएन । खेलमा कोलम्वियालाई ऐतिहासिक जित दिलाउन दोस्रो हाफमा ड्यानियल मुनोजले गरेको गोल नै निर्णायक बन्यो ।

इंग्लिस क्लब क्रिस्टल प्यालेसका डिफेन्डर मुनोजले ६१औं मिनेटमा गोल गर्न सफल भएका थिए । उनले लुइस डियाजको पासमा गोल गर्न सफल भएका थिए ।

खेलको पहिलो हाफ भने स्पेनको पक्षमा रहेको थियो । तर, गोल गर्न भने चुकिरहेको थियो । कोलम्वियाका गोलरक्षक कामिलो भर्गासले स्पेनको आक्रमणलाई विफल पारेका थिए । नवौं मिनेटमा मिकेल मेरिनोको फ्रि हेडर फार पोस्टमा जाँदा स्पेन अग्रता लिनबाट चुक्यो ।

१९औं मिनेटमा स्पेनका एलेहान्द्रो ग्रिमाल्डोको क्रसमा भिभिएनको हेडर क्रसबारबाट थोरै बाहिरियो । २१औं मिनेटमा कोलम्वियाले पाएको मौकालाई सदुपयोग गर्न सकेनन् । ४९औं मिनेटमा मेरिनोको प्रहारलाई भर्गासले उत्कृष्ट बचाउँ गर्दा स्पेनले अग्रता लिन सकेन ।

५७औं मिनेटमा मुनोजको लामो प्रहार क्रसबारमा लागेर फर्कदा रेमिरोले पनि अवसर सदुपयोग गर्न सकेन । ५९औ मिनेटमा हामेस रोड्रिग्वेजले सुवर्ण अवसर खेर फाल्दा कोलम्विया अग्रता लिनबाट चुक्यो । गोलरक्षक भर्गासले फालेको लामो बललाई लुइस डियाजले नियन्त्रणमा लिदै दिएको पासमा रोड्रिग्वेजको प्रहार क्रसबारबाट थोरै बाहिरियो ।

६१औं मिनेटमा मुनोजले गोल गर्दै कोलम्वियालाई १–० को अग्रता दिलाए । ७०औं मिनेटमा स्पेन बराबरीबाट चुक्यो । पेड्रो पोरोको प्रयास साइड नेटिङ हुन पुग्यो । ८७औं मिनेटमा मुनोजको हाफ भली प्रहार सिधै गोलरक्षक एलेक्स रेमिरोको हातमा पुग्यो । इन्ज्युरी समयको थप गरिएको तेस्रो मिनेटमा मेरिनोको प्रहार बाहिरिदा स्पेन बराबरीबाट चुक्यो ।

स्पेनले सन् २०१६ पछि पहिलोपटक मैत्रीपूर्ण खेलमा पराजित पराजय भोगेको हो । सन् २०१६ को जुनमा स्पेनले जर्जियासँग हार बेहोरेको थियो ।

कोलम्वियाविरुद्धको खेलमा स्पेनका प्रशिक्षक लुइस डि ला फुन्टेले तीन युवा खेलाडीलाई सिनियर टोलीमा डेब्यु प्रदान गरे । बार्सिलोनाका १७ वर्षीय युवा डिफेन्डर पाउ कुवारसीसँगै रियल सोसिडाडका गोलरक्षक एलेक्ु रेमिरो र एथलेटिको बिल्वाहोका ड्यानियल भिभियनले स्पेनको सिनियर टोलीमा डेब्यु पाए ।