एजेन्सी – केलियन एमबाप्पेले दुई गोलसँगै एक असिस्ट प्रदान गरेपछि पेरिस सेन्ट जर्मेन (पिएसजी) ले फ्रेन्च लिग वानमा सानदार जित दर्ता गर्दै उपाधि यात्रालाई थप मजबुत बनाएको छ ।

पिएसजीले रेलिगेसन क्षेत्रमा संघर्ष गरिरहेको घरेलु टोली लोरिएन्टमाथि ४–१ को सानदार जित दर्ता गर्दै लिग वानको उपाधि नजिक पुगेको हो । पिएसजीका लागि थप दुई गोल औसमाने डेम्बेलेले गरे । लोरिएन्टका मोहम्मेद बाम्बाले एक गोल फर्काए ।

लोरिएन्टमा बुधबार रात भएको खेलको १९औं मिनेटमा डेम्बेलेले गोल गर्दै पिएसजीलाई अग्रता दिलाए । उनले सेनी मायुलुको पासमा गोल गरेका थिए । २२औं मिनेटमा नुनो मेन्डेसको पासमा एमबाप्पेले गोल गर्दै पिएसजीको अग्रता दोब्बर पारे ।

६०औं मिनेटमा एमबाप्पेको पासमा डेम्वेलेको व्यक्तिगत दोस्रो र टोलीका लागि तेस्रो गोल गर्दै पिएसजीलाई सहज जिततर्फ अघि बढाए । ७३औं मिनेटमा मोहम्मेद बाम्बाले गोल गर्दै खेललाई ३–२ को स्थितिमा ल्याए ।

त्यसपछि इन्ज्युरी समयमा एमबाप्पेले रान्दल कोलो मुएनीको पासमा व्यक्तिगत दोस्रो र टोलीका लागि चौथो गोल गर्दै पिएसजीलाई ४–१ को जित दिलाए ।

यस जितसँगै शीर्षस्थानमा रहेको पिएसजीको ३० खेलबाट ६९ अंक पुगेको छ । पिएसजीले दोस्रो स्थानको मोनाकोलाई ११ अंकले पछि पारेको छ ।

लिग वानमा चार राउन्डको खेल बाँकी रहँदा पिएसजीलाई च्याम्पियन बन्न एक जितको खाँचो छ । अर्काे खेलमा माेनाकाेले अंक गुमाउँदा पनि पिएसजी च्याम्पियन बन्नेछ । पराजित लोरिएन्ट २७ अंक जोडेर रेलिगेसन जोनको १७औं स्थानमा छ ।

लिग वानकै अर्काे खेलमा मार्से र निसले २–२ गोलको बराबरी खेल्दा मोनाकोले लिललाई १–० ले पराजित गरेको छ ।