एजेन्सी – फ्रान्स र नेदरल्याण्ड्स भन्दा अघि रहँदै अष्ट्रियाले युरो कप २०२४ समूह डि मा शीर्ष स्थान हासिल गरेको छ ।

समूह चरणको अन्तिम खेलमा नेदरल्याण्ड्स माथि ३-२ को रोमाञ्चक जित हात पार्दै समूह विजेताका रुपमा अष्ट्रिया अन्तिम १६ मा प्रवेश गरेको हो ।

३ खेलमा २ जित हासिल गरेको अष्ट्रियाको ६ अंक रह्यो । आफ्नो अन्तिम खेलमा पोल्याण्ड सँग बराबरीमा रोकिएको फ्रान्सको ३ खेलमा ५ अंक रह्यो ।

नेदरल्याण्ड्स भने ४ अंक सहित तेस्रो स्थानमा रह्यो । उत्कृष्ट ४ तेस्रो स्थान हासिल गर्ने टोली बन्दै अन्तिम १६ मा पुग्ने नेदरल्याण्ड्सको सम्भावना बलियो छ । पोल्याण्ड १ अंक सहित समूहको पुछारमा रहँदै बाहिरिएको छ ।

आत्मघाती गोलमा अग्रता लिएको खेलमा अष्ट्रियाले दुई पटक अग्रता गुमाउन पुग्यो । तर अन्त्यमा अष्ट्रियाले जित हासिल गर्न सफल रह्यो ।

छैठौं मिनेटमा नै डोनयेल मालेनको आत्मघाती गोलको मद्दतले अष्ट्रियाले खेलमा अग्रता लिएको थियो । तर ४७औं मिनेटमा नेदरल्याण्ड्सका लागि कोडी गाक्पोले बराबरी गोल गरेका थिए ।

५९औं मिनेटमा रोमानो स्मिडले हेडर मार्फत गोल गर्दै अष्ट्रियालाई पुनः अग्रता दिलाए । ७५औं मिनेटमा वाउट वेगहोर्स्टको क्रसमा गोल गर्दै मेम्फिस डिपायले पुनः बराबरी गोल गरे ।

तर ५ मिनेट पछि मार्सल साबिट्जरले पुनः अष्ट्रियालाई अग्रता दिलाए । अन्त्यमा सोही गोल जितका लागि पर्याप्त रह्यो ।