सभापति कप सेमिफाइनल – बागमती र एनआरटी खेल्दै

काठमाडौं (हाम्रो खेलकुद) – सभापति कप फुटबल प्रतियोगिताको दोस्रो सेमिफाइनलमा आज आयोजक टोली नेपाल लोकतान्त्रिक खेलकुद संघ बागमती र एनआरटी भिड्दै छन् ।

त्रिपुरेश्वरस्थित दशरथ रंगशालामा खेल साँझ साढे ५ बजे सुरु हुनेछ। बागमतीले विभागीय टोली नेपाल पुलिस क्लबलाई २-१ ले पराजित गर्दै सेमिफाइनलमा स्थान बनाएको थियो ।

एनआरटीले भने फ्रेन्ड्स क्लबलाई ३–१ ले हराएको थियो । दुवै टिम उत्कृष्ट लयमा रहेकाले आजको सेमिफाइनल भिडन्त रोचक हुने अपेक्षा गरिएको छ । आजको विजेताले बिहीवार उपाधिका लागि संकटा क्लबसँग खेल्नेछ ।

पहिलो सेमिफाइनलमा संकटाले मच्छिन्द्र क्लबमाथि सडनडेथमा हराउँदै फाइनलमा स्थान बनाएको थियो ।

नेपाली कांग्रेसको भ्रातृ संस्था नेपाल लोकतान्त्रिक खेलकुद सङ्घ महाधिवेशन निर्देशन समितिको आयोजनामा सर्वाधिक पुरस्कार राशिको सभापति कपको विजेताले २६ लाख र दोस्रो टोलीले १३ लाख रुपैयाँ प्राप्त गर्नेछ।

प्रत्येक खेल खेल्ने दुवै टोलीले ५० हजार रुपैयाँ पाइरहेका छन् । हरेक खेलका प्लेयर अफ दी म्याचले १५ हजार रुपैयाँ पाएका छन् । दर्शकका‌ लागि साधारण तर्फ १ सय र भिआइपीतर्फ ३ सय रुपैयाँको टिकट दर तोकिएको छ ।