अफिसियल थापालाई सिजनभर प्रतिबन्ध, पोखरालाई जरिवाना

काठमाडौं (हाम्रो खेलकुद) – नेपाल सुपर लिग (एनएसएल) ले बुधबार पोखरा थन्डर्स र ललितपुर सिटी बीचको खेलमा भएको घटनामा दोषी ठहर भएका पोखराका अफिसियललाई प्रतिबन्ध लगाउँदै क्लबलाई जरिवाना गर्ने निर्णय गरेको छ ।

एनएसएलले विहीबार एक प्रेस विज्ञप्ति जारी गर्दै मैदानमा खेल भावना विपरित कार्य गरेको ठहर गर्दै अफिसियल सुन्दर थापा र अफिसियल दीपक श्रेष्ठलाई प्रतिबन्ध लगाएको हो । मैदानभित्र छिरेर रेफ्रीविरुद्ध जाइलागेका थापालाई एनएसएल अवधिभरका लागि रंगशाला प्रवेशमा प्रतिबन्ध लगाइएको छ । लिगले क्लबलाई उनको एक्रीडेसन कार्ड चाडै फिर्ता गर्न अनुरोध समेत गरेको छ ।

त्यस्तै टिमको डगआउटभित्र आक्रोशमा आएर अनुशासन तोडेका अफिसियल दीपक श्रेष्ठलाई पनि २ खेलको प्रतिबन्ध लगाइएको छ । यससँगै पोखरा थन्डर्सले अनुशासन तोडेको र खेल भावना देखाउन नसकेको ठहर गर्दै ५० हजार रुपैयाँ तिर्नुपर्ने भएको छ ।

एनएसएलले अनुशासन समितिले थप अनुसन्धान गरिरहेको र केही थप तथ्य फेला परेमा अन्य कारवाही पनि हुने जनाएको छ ।

खेलमा पोखरा ३-२ ले पराजित हुन पुगेको थियो । ८० औं मिनेटमा रेफ्रीले गोल नदिएको भन्दै पोखराले विवाद सिर्जना गरेको थियो ।