ललितपुर (हाम्रो खेलकुद)- काठमाडौं महानगरपालिकाले लगातार दोस्रो पटक उपत्यकाव्यापी अन्तरपालिका खुला गोदावरी मेयर कप फुटबलको उपाधि जितेको छ ।

गोदावरी–१० टाहाखेलस्थित निर्माणाधीन गोदावरी बहुउद्देश्यीय रंगशालाको झ्यालुन्टार मैदानमा भएको फाइनलमा आयोजक गोदावरी नगरपालिकालाई सडन डेथमा काठमाडौंले उपाधि जितेको हो ।

निर्धारित ९० मिनेटमा गोलरहित बराबरी टाइब्रेकरमा ५-५ को बराबरीपछि सडनडेथमा काठमाडौंले बाजी मारेको थियो। काठमाडौं समग्रमा ८-७ ले जितेको थियो।

गत वर्ष पहिलो संस्करणमा काठमाडौंले चन्द्रागिरी नगरपालिकालाई हराउँदै उपाधि जितेको थियो ।
काठमाडौंले ५ लाख रुपैयाँसहित विश्वकै दुर्लभ चरा काँडेभ्याकुर अंकित ट्रफी प्राप्त गर्यो ।

गोदावरीले ३ लाख रुपैयाँ प्राप्त गर्यो । काठमाडौंका गोलकिपर सुदीप गिरी फाइनल अफ दि म्याच घोषित भए । मध्यपुर ठिमी नगरपालिका अनुशासित टोली घोषित भयो र ५० हजार रुपैयाँ प्राप्त गर्यो ।

गोदावरीका पासाङ लामा प्रतियोगिताको सर्वोत्कृष्ट खेलाडी घोषित भए । ९ गोल गरेका गोदावरीका अरुण लामा सर्वाधिक गोलकर्ता रहे ।

प्रतियोगितामा इमर्जिङ प्लेयर गोदावरीका समिर तामाङ भए भने उत्कृष्ट गोलरक्षक गोदावरीकै विवेक सिलवाल भए ।

उत्कृष्ट डिफेन्डर काठमाडौंका सरोज तामाङ उत्कृष्ट डिफेन्डर,काठमाडौंका सन्तोष न्यौपानेले उत्कृष्ट प्रशिक्षक चुनिए । उत्कृष्टले समान २० हजार रुपैयाँ प्राप्त गरे।

विजेता तथा उपविजेतालाई कांग्रेस महामन्त्री गगन थापा, संघिय सांसद उदय शमसेर राणा, बाग्मती प्रदेशका खेलकुदमन्त्री मीनकृष्ण महर्जन लगायतले पुरस्कार वितरण गरे । वैशाख २० गते सुरु भएको प्रतियोगितामा उपत्यकाभित्रका १३ वटा पालिकाकाले भाग लिएका थिए।