रविन्द्र वाईबा, मकवानपुर

वडा नम्बर ११ ले पाँचौ संस्करणको हेटौंडा मेयर कप फुटबल प्रतियोगितामा विजयी सुरुवात गरेको छ ।

हेटौंडा नगर खेलकुद विकास समितिको आयोजनामा शनिवार सुरु भएको प्रतियोगिताको उद्घाटन खेलमा साविक विजेता हेटौंडा-४ लाई ३-० गोलले हराउँदै ११ नम्बरले सुखद सुरुवात गरेको हो ।

हेटौंडा–५ स्थित पिप्ले–क्याम्पा रंगशालामा भएको खेलमा ११ नम्बरका लागि पदम राईले खेलको पहिलो हाफको १६ औं मिनेटमा गोल गर्दै टिमलाई सुरुवाती अग्रता दिलाएका थिए । यस्तै दोस्रो हाफमा सम्बन्ध डिमडुङ र घलानले समान १ गोल गरे । खेलको म्यान अफ द म्याच राई घोषित भए ।

प्रतियोगितामा उपमहानगरपालिकाका १९ वटै वडाका टोली सहभागी छन्। प्रतियोगिताको फाइनल खेल जेठ १३ गते हुनेछ ।

प्रतियोगिताको विजेता टोलीले २ लाख ५० हजार र दोस्रो टोलीले २ लाख रुपैयाँ प्राप्त गर्नेछ। प्रतियोगिताको सर्वोत्कृष्ट खेलाडीलाई २० हजार रुपैयाँ र अन्य विधागत उत्कृष्टहरुले समान १० हजार रुपैयाँ प्राप्त गर्नेछन् ।

नगर खेलकुद विकास समितिका अध्यक्ष रविन्द्र प्रसाद घिमिरेको सभाध्यक्षता तथा हेटौँडा उपमहानगरपालिकाका उपप्रमुख राजेश बानियाँको प्रमुख आतिथ्यतामा भएको प्रतियोगिता उद्घाटन कार्यक्रममा एन्फाका केन्द्रीय सदस्य एवम् मकवानपुर जिल्ला फुटबल संघका अध्यक्ष टीकाराम लामा र मकवानपुर जिल्ला खेलकुद विकास समितिका पूर्व अध्यक्ष सानू लामा दोङ लगायत वडाध्यक्षहरुको आतिथ्यता रहेको थियो ।