काठमाडौं (हाम्रो खेलकुद)- श्री भगवती क्लब ए डिभिजनमा बढुवा भएको छ। सहिद स्मारक बी डिभिजन लिगमा आज ब्वाइज युनियन क्लबलाई २-१ गोल अन्तरले हरायो।

यो जितमा श्री भगवती एक खेल अगाडि जारी बी डिभिजनमा दोस्रो हुँदै शीर्ष डिभिजनमा उक्लिएको हो। यसअघि प्लानिङ ब्वाइज च्याम्पियन बनेर ए‌ डिभिजनमा उक्लिसकेको छ।

एन्फा कम्प्लेक्समा आज ब्वाइज युनियन र श्री भगवती आमने सामने हुँदा ए‌ डिभिजनमा बढुवा हुन श्री भगवतीलाई ३ अंक आवश्यक थियो। ब्वाइज युनियनलाई ए डिभिजनमा पुग्ने संभावनालाई कायमै राख्न श्री भगवतीलाई हराउनुको विकल्प थिएन।

तर श्री भगवतीले सुरुवातमै गोल गर्यो। छैटौं मिनेटमा शिशिर लेखीले गोल गरे। श्री भगवतीले खेलमा १-० को अग्रता बनायो। ३८ औं मिनेटमा अजित लामाले अग्रता दुगुना गरे। पहिलो हाफ २-० को नतिजमा सकियो।

७९ औं मिनेटमा ब्वाइज युनियनका सन्जिब लामाले एक गोल फर्काए। यो जितको लागि प्रयाप्त भएन। श्री भगवती २-१ को जित निकाल्न सफल भयो।

जितमा श्री भगवती १२ खेलबाट २६ अंक बनायो। योसँगै एक खेल अगावै ए‌ डिभिजनमा उक्लन सफल रहयो। श्री भगवती सन २०१६ मा सी डिभिजन च्याम्पियन बन्दै बीमा उक्लेको थियो।

ब्वाइज युनियनसँग भने १२ खेलबाट १९ अंक रहेको छ। अब उसले आफ्नो अन्तिम खेल जितेपनि श्री भगवतीलाई भेट्टाउन सक्दैन। च्याम्पियन बनिसकेको प्लानिङ ब्वाइजले १२ खेलबाट ३० अंक बनाएको छ।

यो सिजन प्लानिङ ब्वाइज र श्री भगवती शीष डिभिजनमा बढुवा भए। टुसाल युथ क्लब र नयाँबस्ती क्लब सी डिभिजनमा तल झरेका छन्।