एजेन्सी – लियोनल मेस्सी सम्मिलित इन्टर मायमी फिफा क्लब विश्वकप २०२५ को पहिलो खेलमा इजिप्टको अल अहलीसँग गोलरहित बराबरीमा रोकिएको छ ।

हार्ड रक स्टेडियममा भएको खेलमा समूह ए मा मायमीलाई १ अंक दिलाउन गोलकिपर ओस्कार उस्टारीको प्रदर्शन महत्वपूर्ण रह्यो ।

प्रतियोगिताको उद्घाटन खेलमा ३८ वर्षीय अर्जेन्टिनी गोलकिपर उस्टारीले ८ वटा उत्कृष्ट बचाउ गरे । पहिलो हाफको अधिकांश समय उनले अल अहलीको लगातार दबाब सामना गरे। ४३औं मिनेटमा उनले त्रेजेगेट को पेनाल्टी रोक्दै टोलीलाई जोगाए ।

मायमीले दोस्रो हाफमा गोलको केहि प्रयास गर्यो । तर सफलता मिलेन । लियोनल मेस्सीको फ्रिकिक प्रहारमा बल जालीको बाहिर पट्टीको ठोक्कियो भने । परिवर्तित फाफा पिकोल्टले नजिकबाट गरेको प्रहारलाई अल अहलीका गोलकिपर मोहमद एल-शेनावीले मुस्किलले रोके।

खेलको अन्त्यतिर एल-शेनावीले अर्को बचाउ गरे । इन्ज्युरी समयको अन्त्यमा मेस्सीको प्रहारलाई डाइभ गर्दै जोगाए। समूह ए मा ब्राजिलको पाल्मेरस र पोर्चुगलको एफसी पोर्टो छन् ।

सन् २००० देखि फिफाले हरेक वर्ष महादेशीय क्लब प्रतियोगिताको विजेतालाई समेटेर क्लब विश्वकप आयोजना गर्दै आएको थियो । यसपटकदेखि भने नयाँ संरचनामा क्लब विश्वकप हुँदैछ ।

प्रतियोगितामा विश्वभरका उत्कृष्ट ३२ टोलीले प्रतिस्पर्धा गर्दैछन् । ८ समूहमा टोली विभाजन गरेपछि हरेक समूहका शीर्ष २ टोलीले नकआउट चरण खेल्दै फाइनलसम्म पुग्नेछन् ।

फिफाले विश्व फुटबलमा बलियो मानिएको युइएफएलाई १२ र दक्षिण अमेरिकाको कन्मेबललाई ६ स्थान दिएको छ । त्यस्तै ओसेनिया क्षेत्रबाट मात्र १ क्लबले विश्वकपमा स्थान बनाउने प्रावधान रहेको छ ।

एसिया, अफ्रिका र कन्काकाफबाट समान ४ टोलीले प्रतिस्पर्धा गर्दैछन् । आयोजक राष्ट्र अमेरिकाबाट नियमित एमएलएस सिजनको विजेता इन्टर मायमीले पनि प्रतिस्पर्धा गर्ने अवसर पाएको छ ।