एजेन्सी – रियल म्याड्रिड अमेरिकामा जारी फिफा क्लब विश्व‌ कपको सेमिफाइनलमा पुगेको छ।

अन्त्यतिर रोमान्चक बनेको खेलमा बोरुसिया डर्टमुण्डलाई ३-२ ले हराउँदै रियलले अन्तिम चारको यात्रा तय गरेको हो ।

सुरुवाती २० मिनेटमा नै २-० को अग्रता लिएर रियलले खेलमा पकड बलियो। दसौं मिनेटमा फ्रान गार्सियाको सटिक पासमा गोन्जालो गार्सियाले पहिलो गोल गरे। त्यसको १० मिनेटपछि फ्रान गार्सियाले नै नजिकबाट गोल‌ गर्दै अग्रता दोब्बर बनाए।

डर्टमुण्डले जवाफी प्रयास गर्न संघर्ष गरिरहेको अवस्थामा, इन्ज्युरी समयको तेस्रो मिनेटमा म्याक्सिमिलियन बाएरले गोल फर्काएर केही आशा जगाए।

तर, त्यसको केही सेकेन्डमै परिवर्तित खेलाडीको रुपमा मैदानमा प्रवेश गरेका किलियन एमबाप्पेले बाइसिकल किकमार्फत गोल गर्दै रियलको अग्रता पुनः बढाए ।

इन्ज्युरी समयको सातौं मिनेटमा रियलका डिफेन्डर डीन हुइजसेनलाई रातो कार्ड देखाएपछि डर्टमुण्डलाई पेनाल्टी प्राप्त गर्यो। त्यसमा सेर्हो ग्विरासीले गोलमा परिणत गर्दै खेललाई ३-२ बनाए।

डर्टमुण्डको अन्तिम चरणको दबाबका बाबजुद रियलले अग्रता जोगाउँदै जित सुरक्षित गर्‍यो। खेलको अन्त्यतिर थिबाउ कोर्ट्वाले गरेको महत्त्वपूर्ण बचाउले रियलको अग्रता कायम राख्न निर्णायक भूमिका खेले।

११ खेलको अपराजित यात्रासहित आएको डर्टमुण्ड प्रतियोगिताबाट बाहिरिएको छ।

रियल अब सेमिफाइनलमा फ्रेन्च च्याम्पियन पेरिस सेन्ट-जर्मेन (पिएसजी) सँग भिड्नेछ। पिएसजीले त्यसअघि नै बायर्न म्युनिखलाई २-० ले हराएको थियो।