काठमाडौं (हाम्रो खेलकुद) – एपिएफ फुटबल क्लबले राष्ट्रिय लिग फुटबलको लागि प्रशिक्षक राजेन्द्र तामाङलाई क्लबमा पुन: अनुबन्ध गरेको छ ।

यसअघि दुई फरक भूमिकामा रहेर एपिएफको पुरुष र महिला फुटबल टोलीको प्रशिक्षण जिम्मेवारी सम्हालेका तामाङ पुन: एकपटक पुरुष टोलीको मुख्य प्रशिक्षक बन्दै विभागीय टोली फर्केका हुन् । एपिएफले तामाङलाई प्रशिक्षकमा ल्याएसँगै मिडफिल्डर सन्तोष खत्री र फरवार्ड अनिश जिसीलाई पनि अनुबन्ध गरेको छ ।

तामाङले गत वर्ष एएफसी महिला च्याम्पियन्स लिग छनोटमा एपिएफको टोली सम्हालेका थिए । त्यसअघि २०७६ सालको लिगमा पनि तामाङले एपिएफको पुरुष टिम सम्हालेका थिए । त्यसबेला एपिएफले पाँचौ स्थानमा रहेर लिगको अन्त्य गरेको थियो । उनी त्यहाँ २ वर्ष बसेपछि मनाङ मर्स्याङ्दी लागेका थिए ।

राष्ट्रिय टोलीको बन्द प्रशिक्षणमा परिसकेका मिडफिल्डर खत्री नेपाल सुपर लिगमा ललितपुर सिटीबाट खेल्दै उपाधि जितेका थिए । सोहि टोलीका फरवार्ड अनिश पनि एपिएफ फर्केका छन् । अनिशले यसअघि एपिएफबाट प्रशिक्षण गरिसकेका छन् ।

एपिएफ ए डिभिजन क्लबको हैसियतमा राष्ट्रिय लिग खेल्न लागेको हो । एन्फाले ए डिभिजनका सबै क्लबलाई राष्ट्रिय लिग खेल्न आवेदन खुला गरेपछि एपिएफले यो अवसर पाएको हो । त्यसो त गत संस्करणको ए डिभिजन लिगमा एपिएफ रेलिगेसनमा परेपनि थ्री स्टारविरुद्ध उजुरी दायर गर्दै एन्फाले थ्री स्टार र जावलाखेलको नतिजा थ्री स्टारको जितबाट उल्टाएपछि एपिएफको अस्तित्व जोगिएको थियो ।