दिपक न्यौपाने
बुटवल – फर्साटिकर युवा क्लब सैनामैना गोल्डकप फुटबल प्रतियोगिताको सेमिफाइनलमा पुगेको छ । कपिलबस्तु जिल्ला फुटबल संघलाई मंगलबार टाइब्रेकरमा ४–३ ले हराउँदै फर्साटिकर प्रतियोगिताको अन्तिम चारमा पुगेको हो ।
फर्साटिकरले ३० मिनेटमा गौरव बुढाथोकीको गोलबाट लिएको अग्रता जोगाउन नसक्दा अघिल्लो चरण प्रवेशका लागि टाइब्रेकर सम्म कुर्नु परेको थियो । केशव नेपालले ७३ औं मिनेटमा बराबरी गोल गर्दै कपिलबस्तुलाई खेलमा फर्काएका थिए । तर टोली पेनाल्टी सुट आउटमा भने असफल रह्यो ।
जनप्रिय स्पोर्टस क्लब देवापारको आयोजनामा रुपन्देहीको सैनामैना वडा नं ७ मा सञ्चालित प्रतियोगितामा बुधबार युनाइटेड कपिलबस्तु र सुनौलो शान्ति क्लब रुपन्देहीबीच प्रतिस्पर्धा हुनेछ ।
सैनामैना नगरपालीकाको संरक्षणमा सन्चालित प्रतियोगिताको विजेताले १ लाख १७ हजार तथा दोस्रो हुने टोलीले ५८ हजार रुपैयाँ प्राप्त गर्नेछन् । सेमिफाइनलमा पराजित हुने दुई टोलीले समान १२ हजार रुपैयाँ प्राप्त गर्नेछन् ।
