माले (माल्दिभ्स) – माल्दिभ्समा सम्पन्न १८/३० वुमन्स फुटसाल फिएस्टामा नेपाली राष्ट्रिय फुटबल टोलीकी फरवार्ड सावित्रा भण्डारीले उत्कृष्ट खेलाडीको उपाधि जितेकी छन्।
तस्बिर: इमेजेस डट एमभी
प्रतियोगिताको उत्कृष्ट ५ खेलाडीलाई आयोजकले ट्रफी प्रदान गरेको थियो। सावित्राको टोलीले प्रतियोगितामा सेमिफाइनल सम्मको यात्रा तय गरेको थियो। कुर्कुच्चाको चोटका कारण प्रतियोगिताको एक खेल गुमाएकी सावित्राले सेमिफाइनल खेलमा चोटका कारण खुलेर खेल्न सकेकी थिइनन्। उनको टोलीलाई सेमिफाइनलमा पराजित गरेको धिवेही सिफांगेले फाइनलमा फेनाका क्लबसंग ११-२को फराकिलो हार व्येहोरेको थियो। उनले आफुले खेलेको ३ खेलमा क्विन अफ द म्याचको उपाधि जितेकी थिइन्।
सावित्रासंगै नेपालकी अनिता बस्नेत पनि माल्दिभ्स एअरपोर्ट क्लबबाट खेलेकी थिइन्। सावित्राले प्रतियोगितामा खेलेका ४ खेलमा १३ गोल गरेकी थिइन्। यसैगरी प्रतियोगिताको सर्वोत्कृष्ट खेलाडी थाइल्याण्डकि ससिचाले उच्च गोलकर्ताको उपाधि पनि जितिन।
सावित्रा र अनिता दुवै बुधबार नेपाल आइपुगेका छन्।
