जाकार्ता (एजेन्सी)- इन्डोनेसियाको लिगा १ अन्तर्गत आइतबार भएको खेलमा रोहित चन्दको क्लब पर्सिजा जाकर्ताले मिट्रा कुकारसंग १-१को बराबरी खेल्दै लिगमा हारको शृंखलालाई अन्त्य गरेको छ।
फाइल तस्बिर
लिगको छैठौं चरणको खेलमा पर्सिजाका लुइज जुनियरले ३७औं मिनेटमा गरेको गोलले पर्सिजाले अग्रता लिएको थियो। तर, खेलको अन्तिम समयतिर केहि दबाबमा परेपछि पर्सिजाले घरेलु मैदानमा महत्वपूर्ण ३ अंक जोड्न सकेन। मोहमद सिसोकोले मिट्राका लागि ९०औं मिनेटमा गोल गर्दै खेलमा अंक बाँड्न बाध्य पारेका थिए। ३२ वर्षीय सिसोकोले यसअघि आफ्नो करियरमा लिभरपुल, युभेन्टस, पीएसजी लगायतका युरोपका ठुला क्लबबाट व्यावसायिक फुटबल खेलिसकेका छन्। रोहितले खेलको पुरै समय खेलेका थिए।
लिगको पहिलो खेलमा जित हात परेको पर्सिजाले दोश्रो खेलमा बराबरी खेलेको थियो। त्यसयता लगातार ३ खेलमा पराजय भोगेको पर्सिजा यस साता लिगको अन्तिम ३ स्थानमा पुगेको थियो। यस बराबरीसंगै ६ खेलमा ५ अंक जोडेको रोहितको टोली १६औं स्थानमा यथावत छ।
