स्पेन (एजेन्सी) – स्पेनिस ला लिगा अन्तर्गत आइतबार रातिको खेलमा मालागालाई २-०ले पराजित गर्दै २०१६/१७को लिग उपाधि हात पारेको छ। क्लब इतिहासको ३३औं ला लिगा उपाधि जितेको म्याड्रिडले पाँच वर्षपछि लिग उपाधि जितेको हो।
क्रिस्टियानो रोनाल्डोले खेलको दोस्रो मिनेटमै रियललाई खेलमा अग्रता दिलाएका थिए। इस्कोको पासलाई सदुपयोग गर्दै रोनाल्डोले म्याड्रिडलाई उपाधितर्फ लम्काएका थिए। पहिलो हाफमा १-०ले अघि रहेको म्याड्रिडले दोश्रो हाफको ५५औं मिनेटमा करीम बेन्जेमाको गोलसँगै अग्रता दोब्बर पारेको थियो।
यस जितसँगै म्याड्रिडले ३८ खेलमा २९ जित, ६ बराबरी र ३ हारसहित ९३ अंक जोड्यो। दोश्रो स्थानमा रहेको बार्सिलोनाले उत्कृष्ट पुनरागमन गर्दै ऐबारलाई ४-२ले पराजित गरेपनि ९० अंक जोड्दै दोश्रो स्थानमा सिमित रह्यो।
