एजेन्सी – नेपाल र मलेसियाको महिला राष्ट्रिय टोलीबिचको पहिलो अन्तर्राष्ट्रिय मैत्रीपूर्ण खेल १-१को बराबरीमा सम्पन्न भएको छ। कोटा किनाब्लुस्थित लिकस रंगशालामा खेलिएको खेलमा नेपालले १ गोल पछि परेको स्थितिलाई उल्टाउँदै बराबरीमा ल्याएको थियो।
निकै प्रतिस्पर्धात्मक खेलको पहिलो हाफ गोलरहित बराबरीमा टुंगिएको थियो। दोश्रो हाफको ६४औं मिनेटमा मलेसियाका लागि फरवार्ड दाद्री रफिनसले अग्रता दिलाएकी थिइन्। तर त्यसको तीन मिनेट नबित्दै नेपालको लागि सावित्रा भण्डारीले बराबरी गोल फर्काएकी थिइन्। सावित्राको यो मलेसिया विरुद्ध लगातर दोश्रो खेलमा गोल हो। उनकै गोलमा नेपालले ५ महिनाअघि मलेसियालाई पराजित गरेको थियो।
नेपालको लागि सजना राना मगरले टोलीको कप्तानी गरेकी थिइन्। नेपाल र मलेसियाबिचको दोश्रो खेल जेठ १० गते बिहिबार सोहि रंगशालामा खेलिनेछ।
