काठमाडौं (हाम्रो खेलकुद)– मलेसियामा हुने मैत्रीपूर्ण शृंखला अन्तर्गत बुधबार दिउँसो नेपाल र मलेसियाको महिला राष्ट्रिय टोलीबीच मैत्रीपूर्ण खेल हुँदैछ । सोमबार भएको पहिलो खेलमा १-१को बराबरी खेलेका टोली भोलि त्यसै रंगशालामा भिड्दै छन्।
युएमएस रंगशालामा हुने दोस्रो खेलमा पहिलाको तुलनामा प्रदर्शनमा सुधार हुने प्रशिक्षक थापाको विश्वास छ । ‘हाम्रा खेलाडी सुरुमा केही दबाबमा देखिएका थिए । मलेसियन खेलाडीले फिजिकल्ली खेले,’ थापाले हाम्रो खेलकुद डट कमसँग भने,‘ तर २० मिनेटपछि हाम्रो टोलीले स्वभाविक प्रदर्शन गर्दै लय समात्यो । मलाई विश्वास छ दोस्रो खेलमा प्रदर्शन सुधारिनेछ ।’ दोस्रो खेलको पहिलो रोजाईका बारेमा उनले थपे,‘हामी पुरानै ११ बाट सुरु गर्नेछौं । सम्भवतः दोस्रो हाफमा केही खेलाडी परिवर्तन गरिनेछ।’
सोमबार भएको पहिलो खेलमा अन्तर्राष्ट्रिय खेलमा पुनरागमन गरेकी सजना राना मगरले नेपालको कप्तानी गरेकी थिइन्। मलेसियाविरुद्ध २ खेलमा २ गोल गरेकी सावित्रा आफ्नो लयलाई कायम राख्ने सूरमा हुनेछिन्।
नेपाल र मलेसियाबीचको खेल नेपाली समयअनुसार दिउँसो १:३० बजे सुरु हुनेछ।
