काठमाडौं (हाम्रो खेलकुद) – च्यासल युथ क्लब र फ्रेन्डस क्लबले दोस्रो ललित स्मृति यु–१८ फुटबल प्रतियोगितामा सहज जित निकालेको छ । सातदोबाटोस्थित एन्फा कम्प्लेक्सको खेल मैदानमा शुक्रबार भएको खेलमा च्यासलले विभागीय नेपाल एपिएफ क्लबलाई २–० ले तथा फ्रेन्डस्ले सुदुर पश्चिमाञ्चल फुटबल क्लबमाथि ४–१ को सहज जित निकालेको हो ।

च्यासलको प्रतियोगितामा पहिलो जित हो भने फ्रेन्डसको यो लगातार दोस्रो जित हो । च्यासल पहिलो खेलमा झापा–११ सँग १–१ गोलको बराबरीमा रोकिएको थियो । फ्रेन्डसले पहिलो खेलमा मनाङ–मस्र्याङ्दी क्बलमाथि ३–० को सहज जित निकालेको थियो । समूह ‘ए’ को खेलमा नेपाल एपिएफ क्लबमाथि २–० को सहज जित निकाल्दा सुसन श्रेष्ठ र सन्नी व्यन्जनकारले गोल गरे । १९ औं मिनेटमा सुसनको गोलबाट अग्रता बनाएको च्यासलका लागि ५२ औं मिनेटमा सन्नीले गरेको गोल च्यासलको जितमा निर्णायक बन्यो । जितपछि समूह ‘ए’ मा चार अंक जोडेको च्यासलले क्वार्टरफाइनल प्रवेशलाई जीवितै राखेको छ । एपिएफ र सरस्वतीको समान तीन अंक छ ।

यस्तै शुक्रबारै भएको अर्काे खेलमा सुदुरपश्चिममाथि ४–१ को जित दर्ता गर्दा दिपेश प्रसाईंले दुई तथा रुमेश बर्ताैला र धिरज श्रेष्ठले एक–एक गोल गरे । फ्रेन्डसले सबै चार गोल पहिलो हाफमा गरेको थियो । ११ औं मिनेटमा दिपेश प्रसाईंको गोलबाट अग्रता लिएको फ्रेन्डसका लागि पहिलो गोल गरेको चार मिनेटपछि रुमेश बर्ताैलाले गोल गर्दै अग्रता दोब्बर पारे । ३३ औं मिनेटमा धिरजले टिमको लागि तेस्रो गोल गर्दा ४५ औं मिनेटमा दिपेशले टिमका लागि चौथो तथा व्यक्तिगत दोस्रो गोल गरे । सुदुरका लागि सान्त्वना गोल राजेन्द्र देउवाले ७८औं मिनेटमा गरेका थिए। जितपछि समूह ‘बी’ मा लगातार दोस्रो जित निकालेको फ्रेन्डसको ६ अंक छ । समूहमा शीर्ष स्थानमा रहेको त्रिभुवन आर्मी क्लबको पनि ६ अंक नै छ ।

प्रतियोगिता अन्तर्गत शनिबार न्युरोड टिम एनआरटीले जावलाखेल युथ क्लब तथा मोरङ फुटबल क्लबले विभागीय नेपाल पुलिस क्लबको सामना गर्नेछ ।