काठमाडौं (हाम्रो खेलकुद) – विभागीय त्रिभुवन आर्मी क्लब शतप्रतिशत जित निकाल्दै दोस्रो ललित स्मृति यु–१८ फुटबल प्रतियोगिताको समूह विजेताको रुपमा क्वार्टरपाइनलमा प्रवेश गरेको छ । सातदोबाटोस्थित एन्फा कम्प्लेक्सको खेल मैदानमा आइतबार भएको खेलमा आर्मीले फ्रेन्डस् क्लबमाथि ४–० को फराकिलो जित दर्ता गर्दै शतप्रतिशत जित निकालेको हो ।

आर्मीलाई एकपक्षीय जित दिलाउन क्षितिज राज जिटीले दुई तथा विश्वास उदास र दिनेश हेन्जनले एक–एक गोल थपे । एकपक्षीय खेलमा आर्मीले २१ औं मिनेटमा क्षितिजको गोलको मद्दतले शुरुवाती अग्रता बनाएको थियो । २९ औं मिनेटमा क्षितिजले नै अग्रता दोब्बर पारे । पहिलो हाफमा दुई गोल गरेको आर्मीले दोस्रो हाफमा पनि थप दुई गोल गर्यो दोस्रो हाफमा विश्वास उदास र दिनेश हेन्जनले गोल गरे । ५६ औं मिनेटमा विश्वासले डाइभ गर्दै फार पोष्टमा हेडर गोल गर्दा ८१ औं मिनेटमा दिनेशले गोल गर्दै टिमलाई फराकिलो जित दिलाए ।

यसअघि समूह चरणका दुई खेलमा जित निकालेको फ्रेनडस आर्मीविरुद्धको खेलमा भने निरिह देखियो । लगातार तेस्रो जितसँगै आर्मीले तीन खेलबाट ९ अंक जोड्दै समूह ‘बी’ मा शीर्ष स्थानमा रहँदै क्वार्टरफाइनलमा पुगन सफल भयो । हारपछि पनि फ्रेन्डस समूह ‘बी’ बाट उपविजेताको रुपमा क्वार्टर फाइनलमा पुग्न सफल भयो ।

यता अर्काे खेलमा एपिफले झापा–११ लाई पराजित गर्दै क्वार्टरफाइनलमा स्थान पक्का गरेको छ । झापाले भने प्रतियोगितामा तीनै खेल गुमायो । एपिएफको महत्वपूर्ण जितमा सिदार्थ बल र याङ दोर्जे थिङले गोल गरे । झापाका दिक्षान्त राईको गोल सान्त्वना गोल बन्यो । खेलमा सुरुवाती अग्रता बने झापाले लिएको थियो । २२ औं मिनेटमा दिक्षान्तले झापालाई सुरुवाती अग्रता दिलाएका थिए । पहिलो हाफसम्म १–० को अग्रता लिएको झापाले दोस्रो हाफमा दुई गोल खादै प्रतियोगितामा तीनै खेलमा हार बेहोर्यो ।

एपिएफका सिदार्थ बलले ६७ औं मिनेटमा बराबरी गोल फर्कायो । इन्ज्युरी समयमा याङ दोर्जेले गोल गरेपछि एपिएफले महत्वपूर्ण जितनिकाल्यो । जितसँगै एपिएफ समूह ‘ए’ बाट क्वार्टर फाइनलमा पुग्न सफल भयो । प्रतियोगिता अन्र्तगत सोमबार लुम्बिनी र जावलाखेल तथा संकटा र नेपाल पुलिस क्लबबीच खेल हुनेछ ।