काठमाडौँ (हाम्रो खेलकुद) – अखिल नेपाल फुटबल संघ(एन्फा)ले सातदोबाटो स्थित एन्फा कम्प्लेक्सको मैदानमा जारी ललित स्मृति यू-१८ फुटबल प्रतियोगिता अन्तर्गत समूह ‘ए’ बाट क्वार्टरफाइनल प्रवेश गरिसकेको च्यासल युथ क्लबलाई अयोग्य घोषणा गर्दै प्रतियोगिताबाट निष्काशन गरेको छ।
फोटो: एन्फा
च्यासल युथ क्लबले प्रतियोगितामा बढी उमेरको खेलाडी खेलाएको भन्दै सरस्वती युथ क्लबले विरोध जनाउँदै परिपत्र गरेपछि एन्फाको आयोजक कमिटिले प्रतियोगिताको नियमानुसार छानविन गर्दा बढी उमेरको खेलाडी खेलाएको प्रमाण भेटिपछि प्रतियोगिताबाट निष्काशन गरेको हो ।
च्यासल समूहको शीर्षस्थानमा रहँदै प्रतियोगिताको क्वार्टरफाइनलमा प्रवेश गरेको थियो। प्रतियोगिताको पहिलो खेलमा झापासँग १-१को बराबरी खेलेको च्यासलले दोश्रो खेलमा एपीएफलाई २-०ले पराजित गरेको थियो। मंगलबार सरस्वतिविरुद्ध २-१को जित दर्ता गरेको च्यासलले अपराजित रहँदै दोश्रो चरणमा स्थान बनाएको थियो।
च्यासलको निष्काशनसँगै समूह ‘ए’ बाट सरस्वती क्लबले समूह उपविजेताको रुपमा खेल्नेछ। समूह ‘ए’बाट सशस्त्र प्रहरी बल समूह विजेता बनेको छ।
