काठमाडौँ (हाम्रो खेलकुद) – नेपाली राष्ट्रिय फुटबल टोलीले यमन विरुद्ध हुने एएफसी एसियन कपको छनोट चरणको दोश्रो खेलका लागि बिहिबारबाट प्रशिक्षण सुचारु गर्ने भएको छ।
मंगलबार साँझ ७:१५ बजे भारतविरुद्ध मैत्रीपूर्ण खेल खेलेको नेपाली टोली बुधबार रातको ८:४५ बजे नेपाल आइपुगेको थियो। प्रशिक्षक ग्योतोकु कोजिले बिहिबार टोलीले हल्का अभ्यास गर्ने र शुक्रबार देखि पूर्ण रुपमा प्रशिक्षण सुचारु हुने जानकारी दिएका छन्।
नेपाल र यमनबिचको खेल मंगलबार खेलिनेछ। एपीएफको हल्चोक स्थित रंगशालामा हुने खेलका लागि नेपाली टोलीले भारतमा मैत्रीपूर्ण खेल खेलेको हो। भारतविरुद्ध २० खेलाडीलाई छानिएको थियो भने यमनविरुद्धको खेलका लागि केहि खेलाडी थप हुन सक्ने प्रशिक्षक राजु काजी शाक्यले जानकारी दिए।
नेपाली टोलीले सातदोबाटो स्थित एन्फा कम्प्लेक्समा प्रशिक्षण गर्दै आएको छ।
