काठमाडौं (हाम्रो खेलकुद) – विभागीय त्रिभुवन आर्मी क्लब र फ्रेन्ड्स क्लब दोस्रो ललित स्मृति यू–१८ फुटबल प्रतियोगिताको सेमिफाइनलमा पुगेका छन् । एन्फा कम्प्लेक्स सातदोबाटोमा बिहीबार आर्मीले सरस्वती क्लबलाई ५–० र फ्रेन्ड्सले एपिएफलाई ३–२ ले हराउँदै अन्तिम चारको यात्रा तय गरेका हुन् ।
एपिएफविरुद्ध गोल गरेपछि खुसीयाली मनाउँदै फ्रेन्ड्सका खेलाडी ।
रोमाञ्चक खेलमा एपिएफसँग २–० ले पछि परेको खेल उल्टाउँदै फ्रेन्ड्स अघि बढ्न सफल भयो । पहिलो क्वाटरफाइनलमा फ्रेन्ड्स जिताउन आशिष केसी, दिक्षित थापा र निशान थापा मगरले गोल गरे । त्यसअघि एपिएफका अजित वाइबा र प्रदिप रानाले गोल गरे ।
प्रतिस्पर्धात्मक खेलको सातौं मिनेटमा अजितको गोलबाट एपिएफले अग्रता लिएको थिथयो । ३३ औं मिनेटमा प्रदिपले गोल गरेपछि एपिएफको अग्रता पहिलो हाफमै २–० को बनेको थियो । फ्रेन्ड्सले दोस्रो हाफमा उत्कृष्ट पुनरागमन गर्दा एपिएफले अग्रता जोगाउन सकेन । ५० औं मिनेटमा आशिषले गोल गरे भने ७९ औं मिनेटमा फ्रेन्ड्सका दिक्षितले बराबरी गोल गरे । अन्तिम मिनेटमा निशानले गोल गर्दै फ्रेन्ड्सलाई सफलता दिलाए ।
एक पक्षिय खेलमा आर्मीलाई जित दिलाउन दिनेश योञ्जन, रिसव राज अधिकारी र गौरव गुरुङले गोल गरे । टोलीले दुई गोल उपहार पाएको थियो । रिसवको गोलबाट १४ औं मिनेटमा अग्रता बनाएको आर्मीका लागि ६९ औं मिनेटमा दिनेशले अग्रता दोब्बर पारे ।
७८ औं मिनेटमा सञ्जित राईले आत्मघाती गोल गर्दै आर्मीको अग्रता ३–० बनेको थियो । ८४ औं मिनेटमा आर्मीका गौरवले गोल गरे । इन्जुरी समयमा सरस्वतीका मनीषा खड्काले आत्मघाती गोल गर्दा आर्मीको जित थप फराकिलो बनेको थियो ।
प्रतियोगिता अन्र्तगत शुक्रबार जावलाखेल र संकटा तथा नेपाल पुलिस क्लब र हिमालयन शेर्पा क्लबबीच खेल हुनेछ ।
