काठमाडौँ (हाम्रो खेलकुद) – नेपाली राष्ट्रिय फुटबल टोलीले करिब २ वर्षपछि पहिलोपटक राष्ट्रिय टोलीको प्रशिक्षण दशरथ रंगशालामा गरेको छ। मंगलबार हुने यमन विरुद्धको खेलको तयारीमा जुटेको नेपाली टोलीले रंगशालाको प्राकृतिक घाँसे मैदानमा प्रशिक्षण गरेको हो। यसअघि नेपाली टोलीले सातदोबाटो स्थित एन्फा कम्प्लेक्सको कृतिम घाँसे मैदानमा प्रशिक्षण गर्दै आएको थियो।
पछिल्लो पटक सन् २०१५को अगष्ट महिनामा राष्ट्रिय टोलीको प्रशिक्षण रंगशालामा भएको थियो। त्यसयता रंगशालाको मर्मत संभार हुन नसकेपछि सम्पूर्ण प्रशिक्षण कार्यक्रम एन्फा कम्प्लेक्सको मैदानमा हुँदै आएको थियो।
प्रशिक्षणमा भारत विरुद्धको मैत्रीपूर्ण खेलका लागि छनोट भएका २० खेलाडीसँगै अन्य खेलाडी पनि थिए। बन्द प्रशिक्षण आजबाट सुरु भएको व्यवस्थापनले जानकारी दियो।
एसियन कपको छनोट चरण अन्तर्गतको दोश्रो खेलमा नेपालले मंगलबार दिउँसो ३ बजे यमनसँग हलचोक स्थित सशस्त्र प्रहरी बलको मैदानमा खेल खेल्दैछ।
