काठमाडौँ (हाम्रो खेलकुद) – असारको अन्तिम साताबाट सुरु हुने एएफसी यू-२३ च्याम्पियनसिपको छनोट चरणका लागि नेपालले तयारी सुरु गरेको छ। सातदोबाटो स्थित एन्फा कम्प्लेक्सको कृतिम घाँसे मैदानमा आजबाट टोलीको प्रशिक्षण सुरु भएको हो।
कुल ३५ खेलाडीलाई बोलाइएकोमा पहिलो दिनको प्रशिक्षणमा १३ खेलाडीमात्र उपस्थित रहेका थिए। टोलीको प्रमुख प्रशिक्षकमा मेघराज केसी र सहायक प्रशिक्षकमा प्रकाश अर्याललाई नियुक्त गरिएको छ। राष्ट्रिय टोलीका ११ खेलाडीलाई विश्राम दिइएको र उनीहरुले आइतबारबाट प्रशिक्षण सुरु गर्ने टोलीका व्यवस्थापक एवं एन्फाका सहायक महासचिव संजिव मिश्रले जानकारी दिए।
पहिलो दिनको प्रशिक्षणमा गोलरक्षक एलन न्यौपाने, किशोर गिरि, रोमन रसाइली र अशोक बराल उपस्थित थिए। अन्य खेलाडीहरुमा हेमन्त थापा मगर, तेज तामाङ, अमित तामाङ, पुजन उपरकोटी, अमर डंगोल, निरज बस्नेत, अनिल गुरुङ (जुनियर), सजिन थापा मगर र संजोग राइ उपस्थित रहेका थिए।
प्रशिक्षक मेघराज केसी इन्सट्रक्टर कोर्षका लागि जापानमा रहेकाले टोलीको प्रशिक्षण हाल राष्ट्रिय टोलीका प्रशिक्षक राजु काजी शाक्यले सम्हालेका छन्। केसी सोमबार नेपालआएसँगै उनले टोलीको प्रशिक्षणको जिम्मा लिनेछन्।
