काठमाडौँ (हाम्रो खेलकुद) – एएफसी यु२३ च्याम्पियनसिपको छनोट चरणको तयारीमा रहेका नेपाल र बंगलादेशले असारको अन्त्यतिर मैत्रीपूर्ण खेल खेल्ने भएका छन्। संयुक्त अरब इमिरेट्समा (युएई) हुने प्रतियोगिताको समूह ‘डी’ मा रहेको नेपालले पहिलो खेल असार ३१ गते खेल्नेछ।
प्रतियोगिताको तयारीमा विगत डेढ सातायता एन्फा कम्प्लेक्समा प्रशिक्षणरत टोलीले असार २७ गते बंगलादेशको यू२३ टोलीसँग मैत्रीपूर्ण खेल खेल्ने एन्फाले जनाएको छ। मैत्रीपूर्ण खेल सातदोबाटोस्थित एन्फा कम्प्लेक्सको कृत्रिम घाँसे मैदानमा खेलिनेछ।
आयोजक युएईसँगै नेपालको समूहमा उज्बेकिस्तान र लेबनान रहेका छन्। नेपालले पहिलो खेलमा आयोजक राष्ट्र युएईसँग खेल्दैछ भने साउन २ गते हुने दोश्रो खेलमा उज्बेकिस्तानको सामना गर्नेछ। समूहको अन्तिम खेलमा नेपालले साउन ४ गते लेबनानको सामना गर्नेछ।
बंगलादेश समूह ‘इ’मा जोर्डन, ताजिकिस्तान र प्यालेस्टाइनसँग रहेको छ। बंगलादेशले पहिलो खेल साउन ४ गते खेल्नेछ। बंगलादेशको सबै खेल प्यालेस्टाइनमा खेलिनेछ।
टोलीको अन्तिम छनोट अर्को साता हुने व्यवस्थापक संजिव मिश्रले जानकारी दिए। “यू२३ टोलीमा १० जना राष्ट्रिय खेलाडी रहेका छन्। टोली कमजोर छैन। प्रशिक्षकको आवश्यकता अनुसार २० देखि २३ खेलाडीको छनोट गरिनेछ।”
नेपाली टोली असार २९ गते युएईतर्फ प्रस्थान गर्नेछ।टोलीका प्रशिक्षकमा राजु काजी शाक्य, सहायक प्रशिक्षक प्रकास अर्याल र गोलरक्षक प्रशिक्षकमा मृगेन्द्र मिश्र रहेका छन्।
