एजेन्सी – क्यामरुनमाथि शानदार जित दर्ता गर्दै विश्वकप विजेता जर्मनी समूह चरणमा अपराजित रहँदै फिफा कन्फेडेरेसन कपको सेमिफाइनलमा प्रवेश गरेको छ। शनिबार रातीको खेलमा जर्मनीले अफ्रिकन च्याम्पियन क्यामरुनलाई ३-१ले पराजित गरेको हो।
सेमिफाइनल पुग्ने सम्भावना बोकेका दुवै टोलीले पहिलो हाफमा निकै प्रयास गरेपनि कुनै टोलीबाट गोल हुन सकेको थिएन। तर, दोश्रो हाफको ४८औं मिनेटमा केरेम डेमिरबाएले गोल गर्दै जर्मनीलाई खेलमा सुरुवाती अग्रता दिलाए। राष्ट्रिय टोलीका लागि पहिलो खेल खेलेका डेमिरबाएले डीबक्स बाहिरबाट गरेको प्रहार गोलमा परिणत भएको थियो। क्यामरुनका खेलाडी अर्नेस्ट बुकाले ६४औं मिनेटमा एम्रे च्यानलाई फल गरेबापत रातो कार्ड पाएपछि जर्मनीलाई खेलमा थप सहज भएको थियो। टिमो वेर्नरले ६७औं मिनेटमा गोल गर्दै जर्मनीको अग्रता दोब्बर पारेका थिए। उनले डाइभीङ हेडर गर्दै गरेको प्रहर गोलरक्षकले बचाउन सकेनन्।
तर खेलको नियमित समयको १२ मिनेट बाँकी हुँदा क्यामरुनले खेलमा फर्कने संकेत देखायो। भिन्सेन्ट अबुबकारले क्यामरुनका लागि गोल गर्दै अग्रता घटाएका थिए। तर वेर्नरले खेलमा व्यक्तिगत दोश्रो गोल गर्दै पुन: २ गोलको अग्रता बनाए। थप गोल हुन नसकेपछि जर्मनीले खेल ३-१ले जित्यो।
समूहको अंक तालिकामा २ जित र १ हारसँगै ७ अंक जोडेको जर्मनी समूह विजेता बन्दै सेमिफाइनलमा प्रवेश गर्यो। पुछारमा रहेको क्यामरुन भने समूह चरणबाटै बाहिरियो। जर्मनीले सेमीफाइनलमा मेक्सिकोको सामना गर्नेछ।
