एजेन्सी – पोर्चुगलका कप्तान एवं रियल म्याड्रिडका स्टार फरवार्ड क्रिस्टियानो रोनाल्डो जुम्ल्याहा सन्तानको पिता बनेका छन्। यसअघि सरोगेसीको सहायता लिंदै १ छोरा रहेका रोनाल्डोको दोश्रो पटकमा भने जुम्ल्याहा भएको हो।
क्रिस्टियानो रोनाल्डो
३२ वर्षीय सुपरस्टारले पोर्चुगलको कन्फेडेरेसन कपको हार व्येहोरेको केहि घण्टापछि आफु पुन: पिता बनेको घोषणा गरेका थिए। उनको पहिलो छोरा, क्रिस्टियानो जुनियर हाल ७ वर्ष पुगिसकेका छन्। उनको जुम्ल्याहा सन्तानमा दुवै छोरा रहेका छन्।
‘म राष्ट्रिय टोलीको ड्युटीमा खटिएको थिएँ। मैले छोराको जन्म भएको थाहा पाएपनि हाल राष्ट्रिय टोलीमै ध्यान दिएको थिएँ। हामी हाम्रो मुख्य लक्ष्यसम्म पुग्न असफल रह्यौं तर मलाई विश्वास छ हामी समर्थकहरुलाई खुसि दिने सक्नेछौँ।’
पोर्चुगलको राष्ट्रिय टोलीले तेश्रो स्थानको खेलका लागि रोनाल्डोलाई घर फर्कने स्वीकृति दिएको छ। ‘म फुटबल संघका अध्यक्ष लगायत सम्पूर्ण सदस्यलाई धन्यवाद दिन चाहन्छु। अन्तत: म मेरो सन्तानहरुसँग केहि समय बिताउन जाँदैछु।’
रोनाल्डोले आगामी आइतबार हुने तेश्रो स्थानको खेलमा सहभागिता जनाउने छैनन्।
