बार्सिलोना (एजेन्सी)– बार्सिलोनाका पूर्व कप्तान जाभी हर्नान्डेजले कुनै दिन क्लबको प्रशिक्षक बन्ने आफ्नो सपना रहेको बताएका छन् । खेल जीवनको लामो समय बार्सिलोनामा बिताएका जाभीले कतारमा व्यवसायिक खेल जीवन टुंगाएपछि मात्र प्रशिक्षणका बारेमा सोच्ने पनि प्रष्ट पारेका छन् ।

जाभी हर्नान्डेज

६ देखि १५ बर्षसम्मका बच्चाहरुका लागि राखिएको फुटबल क्याम्पका दौरान अल सादका मिडफिल्डरले एक स्पेनिस दैनिकलाई भने,‘म अझै एक बर्ष कतारमा बिताउन चाहन्छु । त्यसपछि बुट थन्क्याउने र त्यसपछि प्रशिक्षणका विषयमा सोच्ने छु । ३८ बर्षको उमेरमा पुग्दा मेरो खेल जीवनको लामो अनुभव हुनेछ । त्यसपछि नयाँ चुनौतिका लागि तयार हुनेछु ।’

उनले एक दिन आफु बार्सिलोनाको प्रशिक्षक बन्न चाहेको पनि प्रष्ट पारेका छन् । ‘ प्रशिक्षक बन्ने मेरो चाहना छु । म कुनै कुरा लुकाउन चाहन्छ । ढिलो वा चाडो म बार्सिलोनाको प्रशिक्षक बन्न चाहन्छु,’ जाभीले थपे,‘तर, त्यसअघि मैले धेरै सिक्नु पर्ने हुन्छ । एक , दुई वा तीन महिना होइन यसका लागि बर्ष लाग्न सक्छ । बार्सिलोनालाई प्रशिक्षण दिन अघि एकदमै प्रशिक्षित हुनु पर्दछ । म फेरी भन्छु एक दिन प्रशिक्षकका रुपमा बार्साको बेन्चमा बस्ने मेरो सपना छ ।’

आफ्नो पुस्ताका उत्कृष्ट मिडफिल्डर मध्येका एक जाभीले सन् २०१५ मा बार्सिलोना छोड्ने अघि १७ बर्ष क्लबमा बिताएका थिए । ३७ बर्षे जाभीले बार्सिलोनबाट ८ वटा ला लिगा, ४ वटा कोपा डेल रे ४ वटा च्याम्पियन्स लिग उपाधि जितेका थिए ।